時下要買部潮得起相機，至起碼都要配個大大靚芒，行出嚟先夠台型！KONICAMINOLTA本周新推DiMAGEX60，機身小巧有如八達通Size，配個唔成比例嘅2.5"大芒，再加3×變焦潛望式鏡頭，真係唔明咁細部機，點擠得落咁多嘢！而且繼承上代嘅優良傳統，相機反應迅速，相片質素亦屬上上之選，最正係唔使3千就有交易，抵玩！
記者：許福合
攝影：陳偉強
ImageGirl：Zoe
Profile
感光元件：500萬像素CCD
變焦：3倍光學、4倍數碼
記憶卡：SD/MMC（內置15MB）
LCD：2.5吋
ISO：50/100/200/400
電源：專用鋰電池
體積：83.5×56×22mm
重量：115g
KONICAMINOLTA（25652192）
近排KONICAMINOLTA推出嘅細機受到唔少好評，好似對上一部X50，外形輕巧，同時拍出嘅相片又有唔錯水準，今次名作之後嘅X60，機身更細嘅同時，功能亦再進一步改良，所以亦受到唔少用家所期待！
八達通Size
記得上次部X50，筆者都玩咗一段時間，已覺得非常細部小巧，今次X60一拎出嚟，感覺更係超細！第一個反應就係立即拎張八通達出嚟度一度，果然同「預期」一樣，幾乎同一個Size，平面咁睇八達通更可以將機身遮晒，可想而知真係名副其實係卡片機身形，而機身厚度都只係22mm，可見機身細得嚟，並無向橫發展，論外形絕對見得人。當反轉機身，更係現時至Hit嘅2.5吋大芒，大芒配細機，芒嘅比例特別誇張，好似拎住個芒影相一樣！影相時個芒反應都唔錯，基本上畫面可緊貼鏡頭移動，不過略嫌畫面較粗，有唔少粒粒，不過好彩呢啲Noise都只係屏幕上出現，將相片上傳番電腦，就完全滑滑淨淨，影響都唔算大。
全球最快0.5秒開機
有留意開DC都可能會記得MINOLTA可以話係首間推出潛望鏡式相機廠，X60同樣採用類似技術，即使無厚厚機身，鏡頭都唔使伸出機身外，同樣可提供3倍光學變焦，唔使等鏡頭伸出伸入就可以Ready影相，經過多代改良，X60所採用技術已經相當成熟，開機速度達到頂級，只需0.5秒就可進入影相狀態，屬同級相機中之最！
而開機「手續」亦非常簡單，只需輕輕一推鏡頭保護蓋即可，同時兼顧簡便同鏡頭保護！至於所使用CCD，就同好多Compact型相機一樣，都係500萬像級別，不過KONICAMINOLTA還特別設計咗個CxProcessIII影像處理器，能大大提高拍攝時相片效果同質素。
超微距拍攝
與接近Size相機一樣，X60都係以儍瓜模式為主，主要設定都由相機負責，不過用家仍可個別調校白平衡、ISO及曝光補償等，而用起上嚟，同一般細機比較，就係對焦好爽快，事關X60除咗具備5點自動對焦外，同時更會將畫面分成256區，用以測光及協助對焦，成功率好高，即使走埋啲，都可以成功對焦。
另外，相機重有偵察拍攝距離功能，在適當環境會自動開啟微距模式，最近可近至5cm拍攝，影吓花花都無問題，對唔少用家都係一個非常體貼嘅設計。儍瓜機自然唔少得內置幾個場景模式，X60基本上內置4個，包括人像、運動、風景及日落Mode，都係最常用得着模式，一般都好夠用！
測試相片
從相片所見，X60相片顏色像真度極高，Model嘅衫唔會變得過份鮮豔，顏色準確，另外，相片好滑淨，Noise唔多，值得一讚。
