四十五條關注組各位大狀都真係寫得，八方日前講過湯家驊會喺六四集會出新書，原來湯大狀重叫埋余若薇同吳靄儀，話不如一齊擺檔，反正佢兩個都有將文章結集成書。
余大狀本新書今年初出版，叫做《薇觀政治》，余小姐喺自序中自爆，細個嘅時候阿媽好嚴，攞住把尺，杏眼圓瞪，同佢惡補英文，重帶住佢走遍全港每家名校報考小一入學試，因為佢阿媽同好多家長一樣，認為學好咗英文，將來就會出人頭地。
咁Audrey當然不負所望，喺英文中小學讀咗十年書，一日睇三本英文書，全冇問題，嗰時佢諗嘢寫嘢講嘢都係用英文，直至九七年當上大律師公會主席，之後重做埋立法會議員，至轉用中文，重喺中文報紙寫文㖭。
湯家驊、余若薇有新書，而吳靄儀就舊年出咗本《23條立法日誌》，八方問梁家傑幾時到佢出，佢一本正經話正在諗緊，因為唔想只係將見過報嘅文章結集喎，即係會有新料，咁就要啲時間喇。
傳真︰2623-9278
電郵︰[email protected]
