上個禮拜三,蘋果日報慈善基金本年度第二季嘅社會服務計劃接受申請撥款期,已經屆滿,喺截止前一、兩日,大使收到唔少機構send計劃書嚟趕「尾班車」。
大使數一數,發現今季收到嘅計劃書超過三十份,反應踴躍,計劃嘅受惠對象包括病患者、傷殘人士、失業人士、長者、單親同低收入家庭。
計劃嘅內容大多以幫助弱勢社群應付基本需要為先,期望改善佢哋嘅生活質素,例如基本家居維修、贊助貧童開學用品同剪髮計劃,另外亦有唔少就業支援計劃,透過培訓令失業人士掌握一技之長,等佢哋早日搵番份工作,自力更生。
為咗令社會服務機構盡快安排推行社會服務計劃,令有需要人士受惠,呢排大使已經忙緊整理所有計劃書嘅資料,而蘋果基金愛心委員會最快會喺六月下旬開會審批計劃書,請各位社會服務機構嘅負責人耐心等候。
下月底有申請結果
若果有社福機構趕唔切喺呢季提出申請,唔使失望,因為蘋果基金資助社會服務計劃一年有四次接受申請,逢三、六、九同十二月就開會審批計劃書,請各位密切留意暖流版公布每季接受申請嘅日期。
暖流熱線
電話:29908688
傳真:23702192
電郵:[email protected]
網址: http://www.charity.atnext.com