老董同煲呔相繼辭職，三司十一局冇咗個特首，重冇埋政務司司長，要由唐唐同孫公一身兼兩職，可謂非常時期，但係個政府冇咗兩個最高層都運作如常喎，你話幾厲害！
不過，八方聽聞，除咗唐唐唔准走開之外，其他問責高官都照樣外訪，好似李少光咁，去完日本又去咗首爾（即係以前嘅漢城）；而煲呔親信「鬍鬚曾」曾俊華亦於聽日出發去韓國，出席喺濟州舉行嘅亞太經濟合作組織貿易部長會議，希望可以喺七月底前，同各個部長達成一份具公信力嘅香港部長級會議宣言嘅「第一份約稿」，為十二月喺香港舉行嘅世貿第六次部長級會議做好準備喎。
「鬍鬚曾」梗係要搏晒命去游說同催谷，因為第六次部長會議會係煲呔坐正後嘅好重要一炮，必定要有掌聲。
不過人人都知班部長好難搞，個個都有自己嘅利益要睇住，一個唔該就拉隊走人、下次再傾，咁就真係勞師動眾，攞嚟搞喇。
傳真︰2623-9278
電郵︰[email protected]