唔好睇財經事務及庫務局局長馬時亨成日講錢講債券，其實佢係個典型住家男人，一講起太太同兩個女，就成個笑晒。
話說上周五晚，香港天氣突然變壞，馬時亨一家喺機場接個細女由美返港，好彩佢班機返遲啲，唔係分分鐘要轉飛去台灣。
八方記得馬仔個細女好叻，當年喺英國考會考，攞咗十個A，馬仔話，個女讀完第二年回港放假，之後會去北京參加一個交換生計劃，佢話個女立志要學好普通話，所以會留喺北京一段時間。
真係咁啱，馬局長聽日亦都會上京，參加「國際證券交易所聯會論壇」，順便推銷香港資本市場，同埋跟進人民幣升值嘅情況，今次有機會碰頭嘅都係國內財金界高官，包括周小川、項懷誠、樓繼偉以及胡曉煉，唔知局長會唔會帶埋乖女去，等佢見識見識？
傳真︰2623-9278
電郵︰[email protected]