今個禮拜三（6月1日）逛九龍灣德福廣場，記得戴番副黑超，點解？因為商場珠光寶氣，怕閃到你眼花囉。
地鐵喺德福廣場打造嘅「黃金大道」，最後第24間珠寶店會喺6月開業，地鐵總商場事務經理陳嘉明表示，為咗令商場成為旺角、銅鑼灣以外嘅另一個珠寶首飾集散地，6月將舉行「珠光寶氣」推廣月，只要喺嗰24間珠寶店購物滿1000蚊（每張單滿100蚊），再喺指定商舖使多100蚊，就可以免費換到由德福廣場形象總監GIGI（梁詠琪）設計嘅鍍K白金手鏈，總共會送出1000條。
德福重落重本印咗本「珠光寶氣GIGI傾心小冊子」免費派發，羅列各間首飾店嘅精品，加上用咗特別印刷技術，小冊子嘅每粒鑽石、寶石都有閃閃生光嘅立體感。
地鐵咁積極為德福廣場做宣傳，唔知係咪同新地嘅觀塘apm商場開咗有關？
君傲灣小鼓隊人多取勝
電視台近排興搞表演比賽，噚日將軍澳君傲灣售樓處都搞咗個兒童才藝比賽，共有10隊參加。
𠵱家啲小朋友多才多藝，唔會獨沽一味淨係識唱歌，冠軍嘅隊伍，就係由一班小學生組成嘅「田小鼓隊」，表演打鼓，既有隊形，又有氣勢。評判之一新世界發展營業及市務總監何伍燕榆重話，最欣賞佢哋嘅表情夠晒投入，就係咁成功贏得5000蚊。
亞軍得主係表演自由體操嘅小朋友，雖然年紀細，但係倒立、一字馬、側手翻，全部都難唔到佢；季軍表演琵琶……另外嘅參賽項目有畫畫、跳舞等等；重有一位小朋友，演唱最近好流行嘅《大長今》主題曲。
第一城𡃁仔入市唔使借
唔好睇少啲後生仔，有啲分分鐘好富貴都冇人知。中原陳世民話，剛促成嘅沙田第一城16座高層H單位，買家只係二十出頭，已經可以一次過畀晒樓價141.5萬，完全唔使問銀行借錢。
據講呢個後生仔家住將軍澳，喺沙士期間，二十歲都未夠，已敢入市買將軍澳廣場，本月沽出賺咗近80萬，轉投之前睇中嘅沙田第一城395呎有裝修單位；眼見銀行加息，決定一次過畀錢，而且唔使屋企人幫手。揀呢區係因為就近返工，貪交通方便同環境好。
貝沙灣炒家計劃陸續散貨
百樂集團羅家寶斥逾10億買嘅薄扶林貝沙灣三期第9座全幢，諗住遲啲拆售部份單位；另一個早期入市嘅投資者黎汝遠，最近就繼續出貨，攞咗三期3座29同30樓SkyGarden單位，搵美聯招標，6月28號截標。
美記楊永健話，兩個單位都係一梯一伙，面積同為3980呎，5房雙套房設計，各連兩個車位；每個意向價5572萬，呎價1.4萬。黎汝遠入貨價每呎1.05萬，若能以意向價賣出，賺三成幾。
成個第三期只係得5個一梯一伙嘅單位，佢透露𠵱家有廠家打算出價1.2億買晒兩伙，重會內置樓梯，打通成巨無霸單位。
貝沙灣三期貨尾，最大一個分層6000零呎，發展商盈大叫價每呎2萬；相連單位要1.8萬蚊呎、分層至少1.6萬。
港置吸引博士生應徵
地產代理行業進入新一輪擴充期，香港置業除咗收購同行外，重不斷招兵買馬大事請人，單喺上個禮拜六舉辦嘅講座同招聘日，就提供成230個空缺，由前線到後勤都有。
港置打鐵趁熱，即場安排面試，據講200零個應徵者，七成具大學程度，個別重有碩士、博士學位㖭，全日埋單共請咗22個前線、11個後勤；另有27個會進行第二輪面試。
睇嚟，港置都要搞多幾次招聘日，先至可以請得齊人。做地產代理𠵱家唔止搵到食，分分鐘有機會年薪百萬，吸引唔少畢業生入行。
電郵地址：[email protected]
