能夠俾車路士班主阿巴莫域治睇中，當然是價值連城的球員，話晒「油王」錢多，出手闊綽。不過，連私人財產都借出，呢位球員認真把閉。邊位？
借用兩星期叉電
阿巴莫域治為咗獎勵英格蘭足球先生林柏特今季神勇表現，決定借出旗下一艘價值六千三百萬鎊（八億九千萬港元）遊艇兩星期，畀呢位英超鐵人同佢西班牙女友一齊享受海上假期。林柏特日日可以陽光與海灘歎世界，趁暑假叉足電，下季再博過；貴為球會老闆，阿巴莫域治呢種做法真少見。
記得去年阿巴莫域治坐遊艇四出邀請心儀球員上船斟介加盟，今個夏天就借畀林柏特，係咪已經傾掂咗新加盟球員，抑或今季改玩用私人飛機斟球員，費事再出現A高爾事件？
臨收山玩飛鏟卡賓想恩尼斯達陪葬？
效力皇蘇達六季嘅俄羅斯中場卡賓，前晚對巴塞隆拿之後就正式掛靴，不過重老馬有火，臨完場飛鏟落巴塞小將恩尼斯達「上下五吋」，臨尾重要攞張黃牌；我求大俠就睇唔過眼，你收山俾人罰停賽都無所謂，不過人哋重有大把世界，搞到受傷長唞，甚至同你一樣收山就唔好啦。
皇馬無錦標無所謂碧咸重識生金蛋
皇家馬德里響七月中進行為期兩星期嘅掘金之旅，其間會去美國、中國、日本打巡迴賽。有贊助公司同皇馬傾掂數，只要碧咸喺上述各站都亮相，就可以將一千五百萬鎊贊助費袋袋平安，認真和味，呢筆錢夠買一個優質球員有餘。當年皇馬簽入碧咸，呢棵樹真係長搖長有囉。
芭蕾舞學校拜師鄧尼練舞功療傷
芭蕾舞呢家嘢同足球都算息息相關，過去唔少球員都透過佢增加柔韌度，對療傷都有效；伯明翰中場鄧尼為咗醫好腳傷，將會去芭蕾舞學校搵專人幫手，希望加快康復步伐。你可以聯想到咁大個男人做芭蕾舞動作未必好睇，但相信會有效，大丈夫能屈能伸，祝佢早日好番啦。
唔識冧米飯班主赫傑被炒無得怨
前羅馬尼亞球王赫傑日前被革去加拉塔沙雷教練職務，據講理由係佢同球迷嘅關係搞得差。話說佢上個月話有球迷偷咗佢手提電話，但其實係佢唔覺意收埋咗落褸袋，事後衰到要登報道歉。堂堂一代名將唔係衰戰績（今季隊波聯賽排第三，比上季進步），而係衰唔識冧球迷。
逢周一至周五見報