電影發明咗百幾年，唔知電影檢查制度發明咗幾耐？我幻想最初開始有人拍電影，然後開始公開放映畀人睇，然後有個話得事嘅人睇咗，覺得唔係幾啱佢老人家胃口，於是就訂立一套準則要大家去跟。後來電影愈進步愈普及嗰啲準則變得愈來愈重要，因為只有聲音加畫面，基本上一睇就明，而且放映一場可以一千幾百人睇，威力強大，所以有人就當咗電影係宣傳工具。二次大戰時期，納粹德國拍咗好多製作水準好高嘅紀錄片作全國放映，宣傳日耳曼民族的優越性。
其實全世界嘅電檢制度大同小異，都係唔好過份暴力，唔好太過色情（不同國家地區有不同尺度），唔好傷害同鄰近地區關係，唔好講政治（電檢條例應該冇講，不過大家識做），諸如此類，都係啲咁上下嘅嘢，總之愈含糊愈好。標準隨着時間，隨着形勢改變。可唔可以加多條小學生都識嘅，叫做唔好講大話。
當然創作人可以挑戰呢啲準則，亦都可以繞道而行另找創作出路，但係有時我都講到明個古仔係老作嘅亦都自問唔過份，但係你重要剪就真係唔明。另外有啲國家嘅準則都幾令人莫名其妙，馬來西亞就要求惡人有惡報，大家都聽聞過《無間道》馬來西亞版結局劉建明係被拘捕，咁唔知佢哋點睇得明《無Ⅲ》呢？佢哋又照上映照睇喎！奇怪！不過有單嘢重奇怪，原來劉偉強套《古惑仔》七集嘅馬版結局都係陳浩南行入警局向上司報告任務完成，會繼續執行作為卧底打擊黑社會的工作。問你死未？