衫褲鞋襪電腦玩具老翻四仔化妝品……旺角乜都有，食肆都一籮籮，單一條女人街（通菜街）已有數十間食肆，行街行到喪餓想即刻「Lam飯」，中西日意等等菜式任君選擇，選擇太多反而難選擇？以下旺角子民Nick同Elyse推介的四間食肆開業約半年，又睇吓啱唔啱你口味？
記者：陳冰麗
攝影：陳智良
激冧！意房菜：情侶撐枱腳至啱
Elyse推介：「我成日同男友仔嚟呢度撐枱腳！」小情侶拍拖想整番個平價燭光晚餐，入「意房菜」就最啱。此店以柔和的藍色做主調，頭頂盞盞昏黃刻意營造Relax氣氛，每枱放一隻盛了小蠟燭的玻璃杯，火光是弱了點，但亦不失浪漫。食物方面，配搭新穎有創意，集意法多國Fusion菜，質素絕不會令你失望，最重要是價錢合理，必試菜式有日賣100客的焗酥皮法國鵝肝牛柳。
意房菜（23329928）
地址：通菜街2Q號鴻輝大廈地舖
營業時間：星期一至六12:00nn至1:00am，星期日1:00pm至1:00am。
座位：46個
必食推介：焗酥皮法國鵝肝牛柳$49
日賣100客，鬆軟牛柳伴酥皮、鵝肝吃，香甜鮮滑，加$10轉套餐包餐湯、澳洲生蠔2隻或芝士煙肉焗青口2隻、台式飲品1杯。
法式多爾多黑松露雜菌伴美國極黑豚肉扒$79
地道法式做法，配黑松露醬、雜菌及蛋同炒，黑松露菌的鮮香味才能長留口腔，包龍蝦湯、台式飲品及Tiramisu。
南極鱈魚扒拼辣肉醬雞卷拌瑞士白蘑菇汁$79
一碟兩汁，墨西哥風味辣紅汁配雞扒、瑞士清香蘑菇白汁配鱈魚扒，味道超夾，包龍蝦湯、台式飲品及Tiramisu。
激抵！九代：愈多人食愈抵
Nick推介：「女人街N咁多間日本料理，必試『九代』。」何解？一句到尾──平！再問點平，$15半磅三文魚刺身，必食！內有15款不同口味壽司的八目壽司盒$100有找，除番每件不過$7，愈多人食除愈抵，兩人食必定捧住肚子走。店舖環境算闊落，枱椅分布不算擠迫，店員態度友善，二人撐枱腳Hea足成晚都無人白眼。
九代日本料理（35831826）
地址：通菜街1M、1N、1P至1T華發大廈地下A1至A2號舖
營業時間：12:00nn至4:00pm及6:00pm至12:00mn
座位：約40個
必試推介：八目壽司盒$98
（右至左）
a.鰻魚片綠豆茸果子
b.鰻魚片蘆薈果子
c.鰻魚片紅豆茸果子
d.三文魚鰻魚板壓壽司
e.黑蟹子吞拿魚腩茸卷
f.紫菜蛋卷
g.四季卷（雞蛋餡）
h.芥辣蟹子吞拿魚腩茸卷
i.三文魚花之戀
j.米通辣吞拿魚卷
k.炸櫻花蝦卷
l.牛油果軟殼蟹卷
m.龍蝦沙律壽司
n.海膽三文魚子壽司
o.北寄貝沙律壽司
三文魚刺身半磅$15
半磅約有10件左右，記者試過三文魚新鮮肥美，沒有將貨就價。
秋刀魚千葉卷$32
秋刀魚起肉，捲不辣的日本溫室青辣椒燒，啖啖甘香鮮美，唔使慌鯁骨。
激正！全京記：夜貓族醫肚飲夜茶
Nick與Elyse是夜蒲一族，玩到凌晨兩點等閒事：「我哋食消夜，一定去『全京記』。」「全京記夜茶」原本只做湯麵，去年尾開始提供夜茶，通頂營業至凌晨六時，莫講話飲夜茶，蒲天光飲早茶都重得。此店免茶芥，十多款點心、包點一律$10，擺低個金銀膶即歎皮薄餡靚鮮蝦餃，熱辣辣超正！唔夠？整多盅蒸飯喇，店舖有個大電視長播now.com電視節目，歎茶睇電視甚至睇波，唔會齋食咁悶啦！
全京記夜茶（27873768）
地址：通菜街86號利群大廈地下E舖
營業時間：7:00pm至6:00am
座位：約25個
激香！新之食：超香特色手攪麵
Nick推介：「每次單拖搵食，我都會簡簡單單整番碗手攪麵，碗麵香到索鼻。」說得對，鋸扒無Honey陪唔夠Sweet、一條友食日本料理又得個悶字、咬碗魚蛋粉又覺得自己好可憐，倒不如歎番碗日賣70碗的手攪麵！麵糰經人手壓扁放入麵條專用機，攪成麵條即落水烚，即叫即做香味四溢，煙韌彈牙，唔夠喉？整多碟油菜都不過$3，埋單$20有找。
新之食（27700636）
地址：通菜街47號地舖
營業時間：10:30am至2:00am
座位：40個
其他精選推介
必試牛油炸墨丸
「料理天堂」雖然地方細細，但此店是旺角區難得有衞生證書的食肆，奄尖聲悶的女仔一樣食得放心！這裏的日式小食頗有特色，必試牛油炸墨丸，炸香的墨丸滲雜香濃的牛油味，鹹鹹香香，好好味。
料理天堂（23880688）
地址：通菜街2M地下
營業時間：星期一至六11:30am至3:30pm及6:00pm至11:30pm，星期日6:00pm至11:30pm。
浪漫氣氛撐枱腳
此店適合情侶撐枱腳，情侶套餐百多元有交易，老闆久不久就自創新菜式，必試蟹子海皇翅，用料全來自日本，以多種海鮮及蟹子做成，味道、口感不錯。
風の谷（28072727）
地址：通菜街2Q至2Z號地下R舖
營業時間：星期一至四11:00am至11:00pm，星期五至日12:00nn至12:00mn
旺角歎特色葡國菜
除掛大電視外，每張枱都有個迷你電視，必試招牌軟骨皇子鴿，頗有水準，慳番張船飛去澳門食葡國餐。
澳門路環茶餐廳（23886676）
地址：通菜街27號地下
營業時間：8:00am至12:00mn
