小飛俠可以話係一個家傳戶曉嘅兒童床邊讀物，不過今個星期新出嘅《小飛俠前傳之魔幻童心》，大家千祈唔好搞錯，裏面唔會見到小飛俠大戰鐵鈎船長，亦唔會見到小仙子開心喺樹林飛舞；故事係由《小飛俠》之父──占士巴利真人真事改編，講一個山窮水盡才子，如何從4個可愛小朋友身上再發現童真、童心！故事感人，亦嘗盡人世間悲歡離合，不過對小朋友就略嫌沉重，大朋友則絕對值得思考。
記者：朱崇德
音效：杜比數碼EX/DTSES6.1環迴音效
字幕：中、英文字幕
發行：得利影視
區碼：3區
DVDPro（23326326）
地址：旺角奶路臣街6E德發商場地庫B4舖
舊年係《小飛俠》誕生100周年，所以先後拍了《小飛俠2004》同《小飛俠前傳之魔幻童心》兩齣電影，用以傳頌這本百年鉅著；不過可能後者屬「劇情片」，令人擔心到票房關係，電影延擱至今年二月先喺香港戲院上畫！另外，筆者今個星期巡碟舖撞到一則笑話，話說有個靚媽咪帶住個仔逛碟舖，一手執起呢集《小飛俠前傳》問店員：「《小飛俠》都好似《星戰》咁拍番前傳喎！咁係咪都對番鐵鈎船長㗎？」店員諗咗一諗答道：「我唔清楚，我諗係啩！」真係吹脹！
人生谷底 創小飛俠
故事係改編自艾倫里爾原著舞台劇《TheManwhowasPeterPan》，講才華洋溢的蘇格蘭劇作家占士巴利（尊尼特普飾）曾創作過無數極受歡迎的舞台劇，可惜其公式化的作品已漸令人感到沉悶，而且亦在這段低潮時間，與妻子鬧翻，兼妻子紅杏出牆；在這段「谷底時間」巴利遇上年輕寡婦茜菲亞（琦溫絲莉飾），並和她4個小孩成為好友，意想不到的是孩子們純真童心，竟成為他幻想世界的推動力，畫鬼臉、遊戲、惡作劇幻化成小天使、野孩子和夢幻島，一個傳頌百年的魔幻童話「小飛俠」因此誕生！
真實虛幻 相互穿梭
老實講句，睇《小》時真係有好濃重的《大魚奇緣》感覺！真實同幻想空間互相穿插，有兩幕特別惹人注意，一是去到4個小孩子家中，竟然由簡單的小朋友跳彈床，創出小飛俠；大家細路仔時曾受過皮肉之苦的「衣架」，竟然是鐵鈎船長的前身，一幕一幕的推進，小飛俠一步一步成形，叫人愈睇愈入戲。
另一幕令人印象深刻，就是中段扮海盜遊戲，現實同幻想空間轉換得絲絲入扣，充份表現出一份童心未泯，夢幻童真！
肥溫演出 令人入戲
另一個叫人買碟入場的原因，相信好多人都係為咗尊尼特普，英國靚仔紳士的打扮，的確叫人幾討好，不過相對上一套迪士尼的《魔盜王》，好似今次就少咗一份狂氣和鬼馬的演出，簡單講就係扮「大男孩」、但太認真，令電影稍覺失色；不過最估唔到嘅係琦溫絲莉，自《鐵達尼號》之後，都唔覺佢拍過邊齣好戲，今次演一個可憐寡婦，苦過梁天來式7級肺癆，又要帶住4個超級百厭仔，同尊尼特普的一段情又似虛似幻撲朔迷離，感覺演出自然情真，係令觀眾入戲的重心人物，值得留意。
必睇Bonus
蝦碌片段 爆粗又爆笑
話晒都係奧斯卡金像獎7項提名兼得「最佳原著音樂獎」，Bonus當然落足料，刪剪片段、演員訪問、製作特輯樣樣畀齊，好睇！喺蝦碌片段，尊尼特普成日有意無意向小朋友爆粗，真係好鬼馬，另一段都係尊同大狗演一場戲，尊念台詞時感情投入，大狗表情更「七情上面」，真係好戲到你唔信，勁爆笑！
