立法會議員噚日同政府官員打一年一度足球友誼賽，由於煲呔曾辭職選特首，隊波就交由署理政務司司長孫明揚領軍，議員隊陣中有民主派參選特首候選人李永達，話就話達仔賽前同孫公握晒手好老友，萬一政府輸波，特首「第一戰」就輸，你叫煲呔顏面何存？
原本高官隊係威係勢領先二比一，連議員隊唯一入球機器陳偉業射十二碼都宴客，點知後來達仔要去選舉論壇走先，陳偉業立即入番一球迫和二比二完場，大嚿話今年高官隊喺老董下台、保皇黨「內應」下，果然士氣大振，由上年輸波變今年和波，但八方話更大可能係因某人辭咗職，一向心入面好唔順呢個人嘅公務員，自然零舍醒神，出年某人更上一層樓，可能又變番輸波！
爆料熱線：29290000、27860099
報料傳真：26239278
報料電郵：[email protected]