荷李活天王巨星湯告魯斯（TomCruise）自公開同二十六歲嘅女星姬蒂荷姆絲（KatieHolmes）拍拖後，外界一直議論紛紛，美國公眾對佢哋嘅戀情都半信半疑。
靚佬湯同女友分別主演嘅科幻巨製《強戰世界》同《蝙蝠俠──俠影之謎》下月上映，兩部都係投資龐大嘅暑期大片，絕對不容有失，所以大家覺得靚佬湯同姬蒂突然宣布拍拖，只係催谷新片嘅宣傳伎倆。美國兩大雜誌《People》同《UsWeekly》就呢單新聞向讀者調查，結果分別有百分之六十三同百分之六十五讀者，認為佢哋嘅戀情係假嘅。
高調嚇親人
而《紐約時報》亦有作家喺專欄度話有策略嘅愛情，係最容易收到宣傳之效嘅，似乎暗示緊靚佬湯借戀情谷宣傳噃。
可能有人會講番當年靚佬湯同《魂離情外天》拍檔彭妮露古絲（PenelopeCruz）拍拖之初，亦有人話佢哋博宣傳，結果佢哋拍咗接近三年拖先分手，證明唔係假嘢。但今次靚佬湯又真係好刻意，好似上星期佢上奧花雲費（OprahWinfrey）節目時，就大跳大叫話自己拍緊拖，真係嚇親唔少人。
自言愛穩定
另外，靚佬湯早幾日接受電視訪問時，話佢信奉科學教派並唔係令佢同妮歌潔曼（NicoleKidman）分手嘅原因，反而話係一直唔同意妮歌當年話唔信一夫一妻制，因為佢本身係好需要穩定關係同家庭嘅人。