累積咗一批讀者電郵，發覺好多讀者詢問同一類嘅問題或者就同一題目發表意見，為節省時間，不如一次過講晒。
（一）本欄講過Now寬頻電視，有好幾位讀者來郵反映，無論Now與有線電視嘅「訂頻道」（channelsubscription）嘅收費與程序，都令客仔不滿，令客戶覺得「唔抵」、麻煩、嘥時間。具體事情，無謂再覆述，請兩個主要收費電視台，Now與Cable，加緊改善你哋嘅服務，真係做到userfriendly，令觀眾覺得物有所值，其實好多中產已經慢慢地放棄免費電視，願意畀錢收費電視，但畀完錢都條氣唔順嘅話，佢地咪費事畀囉。
（二）好多人問四月十一日本欄講「糖尿」嗰篇嘅內容，因為太多，不能一一回覆。再講一次，買苦瓜乾不一定要去中環B記買（雖然B記啲苦瓜乾乾淨啲，貴價啲），一般中藥材舖就有啦，平好多㖭，總之用清水沖洗一番之後先至煲，就比較乾淨，寒底之人飲完如果覺得頭暈就要停服，問吓執藥師傅就會教你嘅嘞，太多人問B記地址，不能一一答覆。
（三）其他人問玄學C師傅及每日炒賣股票之專家姓甚名誰，可否介紹，恕不作答。炒賣專家自己有耐性、有狠性，佢話呢樣嘢教唔到人，而炒股技術並不是甚麼秘密，大家肯做功課，睇多啲圖表與投資分析書本，就會知道啲基金經理嘅思維。問題係timing好講究個人的經驗與投資目標，好難教嘅。C師傅就話大家有緣便可相見，叫左丁山唔好同佢賣廣告。
（四）一位讀者問「馬歇爾歇馬」何解，馬歇爾係邊個？馬歇爾係美國將軍（1880-1959），上網查「馬歇爾計劃」（TheMarshallPlan）或查GeneralGeorgeMarshall，就知道佢嘅威水史。馬歇爾歇馬，馬歇爾就係GeneralMarshall，歇馬，就係拉停隻馬休息，唔再向前咁解。