雖然暑假未到，不時重會落大雨，但都要開行冷氣辟走霞氣同驅暑，有無發覺噴出嚟嘅冷風間中會傳出陣陣異味？若然唔想花成千蚊交畀車行代為清理，其實你都可以付出約百幾蚊同一個鐘頭時間，實行清洗汽車冷氣DIY！
記者：陳偉林
攝影：陳偉強
ImageGirl：Kendy
鳴謝：富利堡汽車（28776700）
霉菌凝聚冷氣管
唔少汽車美容中心都會吹噓自家引入咗甚麼先進的清洗汽車冷氣裝置，但車主花了千幾蚊之後效果都唔顯著！據筆者向資深行內人士打聽，每當開啟汽車冷氣後，冷氣受熱會變回水珠凝聚在冷氣喉管之中，日子久了會變成霉菌及發出異味，就算在車內擺放強勁的芳香劑，由細菌引起的異味仍然會揮之不去，治標唔治本，嚴重的話更可能惹起呼吸道疾病㗎！
咪以為清洗汽車冷氣系統，係一件既繁複又專門的工作，查實只要你跟步驟清洗汽車冷氣，加上部份清潔劑可以多次使用，圍埋條數每次都唔使一百蚊，年終真係慳番唔少！
事前Shopping清單
1.家用消毒噴霧（約$20）
各大超級市場有多個品牌選擇，謹記係消毒噴霧並非芳香噴劑。
2.汽車用消臭煙霧劑（約$40）
各大汽車用品店有售，分有日本或韓國製造，有專供家庭車或MPV車用。
3.汽車用地氈清潔噴劑（約$60）
各大汽車用品店有售，可多次使用，計起每次唔使幾蚊。
4.汽車用清洗冷氣「揮發器」噴劑（約$90）
各大汽車用品店有售，舊式汽車不設可裝拆冷氣塵隔，用嚟清洗冷氣塵垢用。
DIY洗冷氣10部曲
清潔地氈
先用吸塵機或掃把將車廂清潔一番，事關汽車地氈最易藏污納垢。
除隔塵隔
先拆除收於首飾箱下的汽車冷氣塵隔（大部份日本車屬同一設計），若需要的話可先換掉紙製隔塵網以及用潔布清抹內裏冷氣風扇，待清洗冷氣過後才裝回亦可以。
扭向回風
關上冷氣生風口在回風狀態下。
調校風口
將冷氣風口調校至向上吹或向擋風玻璃吹去。（註：切記勿向腳部下吹）
調至高溫
將汽車冷氣調校至最高溫度狀態。
關上門窗
將汽車冷氣風速調校至最高位（熱風），同時關上四門電窗，在車外靜候10分鐘左右（大型MPV車或需15-20分鐘），好等熱風將藏於冷氣喉管中的霉菌清除。
清洗喉管
打開買回來的汽車用消臭煙霧劑，一般加入適量清水後，將器皿放在首飾箱下的冷氣回風口，好等煙霧劑經風扇抽送至冷氣喉管中每個角落。（需時約10分鐘）
噴揮發器
要更徹底的話，依照說明書指示，用清洗冷氣「揮發器」噴劑注入擋風玻璃下的位置，同時要開啟冷氣以運行帶動清潔劑入「揮發器」中，需時約6分鐘左右。
消毒風口
最後以家用消毒噴霧噴灑上每個風口位置。
消毒車廂
整個車廂可用消毒噴霧噴灑每個地方，帶來滿室清香同潔淨空氣。
後記
每季最少4次
汽車冷氣系統每季需要清洗4至6次，少開冷氣的日子亦須1至2個月清洗1次，以確保車廂無異味。