日前漁護署於網上舉辦全港最佳郊野景點選舉，以特有的多種地質特徵而聞名的東平洲，大比數勝出榮登首位。雖然地理偏僻路程遠，但點都要趁假日自辦短線遊，上島觀奇石不特止，今勻重要落水玩體驗潛水，一次過上島下海，見識全港至靚景點。
記者：梁彩燕
攝影：林栢鈞
Model：Bianca
東平洲（即平洲島），位於香港東北水域，由於長年累月受海浪侵蝕，形成海蝕平台同堆積階地，全島最高點只有48米高，而扁平的岩石遍布整個東平洲的海岸線，擁有如此奇特地形，所以就叫東平洲喇！而早前東平洲被大比數網友選為全港最靚景點，每年平均有成8萬人曾到訪或度假㗎，響島上可以觀鳥、賞植物、睇石岸山境，重可以響兩個珊瑚核心區進行潛水活動，咁有吸引力，你都要嚟郊遊吓啦！
龐大珊瑚群
島上風光明媚，水底當然唔會令人失望！2001年年尾，東平洲已被劃為第四個海岸公園，皆因呢度擁有多樣化嘅海洋生態，點多法？呢度有超過30種石珊瑚、130種珊瑚魚同100種海洋無脊椎物，而海藻亦搵到有40幾種，響龍落水沿岸地帶長滿咗棕色、紅色同綠色嘅海藻床，所以有全港海藻床之冠嘅稱號。
先學水底溝通手勢
教水底溝通手勢
唔識游水都可以玩潛水，由西貢白沙灣碼頭出發，船程約兩個幾鐘，順便觀賞沿途的不知名或知名小島、海蝕洞。教練同學員採一對四分組，趁在船上空檔，就教授吓儀器嘅用法、反壓法同水底溝通手勢，簡單易明，但亦要用心點牢記。
唔識游水都可潛水
船漸漸駛至近岸，海面一片清澈藍澄，未落水已經心癢癢。就選址碼頭附近的阿媽灣及大塘灣一帶，好，上小艇去淺灘，在淺水位先練習吓呼吸方法及儀器使用，各人準備就緒就下海去。教練引領，約10呎水深位可漸見珊瑚群，重有各類珊瑚魚、小丑魚到處穿梭……唔識游水嘅Bianca上返岸大叫興奮刺激，只要唔緊張放鬆心情，落到水底就乜都有得睇！
更樓石柱龍落水奇觀
越過天后廟，繼續向前走會遇到兩塊大石柱，我哋可從兩柱之間的縫隙攀上石頂，眺望前方大鵬灣遼闊海景。向西行見「龍落水」，此點岩層有百幾米長，三角形石塊似龍脊，整條彎彎曲曲的就好似神龍咁由山坡直入海底，奇景令人歎為觀止。有時間可繞島繼續行程，必令你眼界滿載而歸。
環島賞石漫遊
山長水遠嚟到東平洲，點可以唔上岸行番個轉！假日去玩，碼頭會有小檔賣汽水小食，重會派多張東平洲地圖仔畀你，望住地圖向東面綑邊而行，快嘅3、4個鐘都行晒。有舊居民的破屋、天后廟，亦有士多攤檔可食個杯麵唞一唞，沿途亦有告示板、路標、涼亭及廁所等基本郊遊設施，算唔錯。若想過夜睇日出，島上有六所「士多度假屋」可預約，村民會提供簡單的床鋪同膳食。價錢唔貴，住宿一晚約需$30一個人。
跟團去：
市面上間中有團體搞體驗潛水，每次潛水點唔同，夏天除咗出海釣墨魚，又多一個好去處，有興趣不妨睇睇。
「周末潛水假期」
日期：6月12日
時間：9:00am至6:00pm
潛水地點：蚺蛇灣、黃茅洲的珊瑚區
內容：由教練介紹潛水活動，親自陪伴參加者潛入3-20呎深度的珊瑚區，觀賞珊瑚魚活動。
資格：10歲或以上，體格健康人士
費用：$480/人
包括：全套潛水裝備借用、教練費、膳食及飲品。
聯絡人：SimonChang
潛水教練
手提：94000071（可於每日3:00pm-11:00pm致電查詢）
電郵：[email protected]
自己去：
潛水活動最好由有牌的潛水教練帶領，但亦可與朋友到東平洲來個短線一日遊，賞賞奇石，但來往東平洲的船期極疏，只有星期六、日有船，來回船票$80，出發同回程記得要夾啱時間。
東平洲船期：
馬料水碼頭開出
星期六：9:00am及3:30pm
星期日：9:00am
東平洲王爺角碼頭開出
星期六：5:15pm
星期日：5:15pm
預訂船票：25272513（翠華船務公司）
