立法會議員余若薇平日對住官員非常硬朗，不過一見到老公胡健維醫生，余大狀即刻變成小女人，佢講過女人點叻都好，但喺老公面前都要擺出「乜都靠晒你，無咗你唔掂」咁款，余大狀呢招肯定使得，結婚四分一世紀都咁恩愛。
筵開八席宴親朋
有個又叻又靚，而且肯生三個女嘅老婆，套用煲呔嗰句，胡醫生真係身在福中，為𠱁老婆高興，胡醫生噚日就喺一間五星級酒店筵開八席，請一班至親好友一齊慶祝佢同大狀老婆銀婚之喜，余大狀平日已被譽為喺立法會中衣着最有品味嘅女議員之一，噚晚佢身穿粉紅色喱士連身裙出場，更係明豔照人，高貴大方，同胡醫生真係郎才女貌，見到佢哋咁幸福，相信羨慕死唔少人。
嫁到個好老公，余大狀相信係香港政壇最幸福嘅女人之一，另一個應該係湯家驊老婆Daisy，早前兩人結婚三十周年，湯大狀特別擺咗幾圍慶祝，湯太個心甜到漏啦。
爆料熱線：29290000、27860099
報料傳真：26239278
報料電郵：[email protected]