薛凱琪入行以來總令人覺得人際關係欠佳，對此她直言拒絕埋堆，亦懶得討好別人，故此難與其他歌手交往，薛凱琪有感而發說：「原來娛樂圈唔止friendly，係要soveryfriendly！」
是非篇：
冇時間同歌手深交
薛凱琪的負面新聞一直不絕於耳，對於被指為「獨孤精」、被歌手群起排斥，日前薛凱琪在銅鑼灣接受訪問時說：「我唔係被歌手排斥，係冇時間同歌手深交，我見到啲人永遠會有笑容喺臉上，我一定唔會唔睬佢。咁係咪約去卡拉OK至叫friend？有時間我會分一半畀爹哋媽咪，一半畀朋友，已經再冇時間約其他人。」
唔做親善大使
薛凱琪續說：「話我拍戲拍到勁被人杯（杯葛），唔係囉，大家都忙到冇時間行街睇戲，冇理由因為薛凱琪做親善大使，夾硬約人出街，要去埋堆，我唔使咁樣。呢行會係我嘅終身職業，慢慢俾人睇啦，我都想同啲歌手makefriend。」
薛凱琪的名字，多與「寸」、「沒禮貌」、「態度囂張」的形容詞扯在一起，她卻說：「自己都辛苦㗎，我鍾意去卡拉OK，入行後盡量唔去，又唔去蘭桂坊、唔同男仔單獨出街，點知俾人寫我人格，是但登你一幅相就可以寫。我相信自己係惹是非嘅人，講嘢就話我『咇哩巴啦』，攰唔講嘢就係寸，但我好懶去討好人哋。我唔會諗自己好有性格，個個行內人都要去討好，咁個個都一樣啦。入行前以為對人friendly就得，原來娛樂圈唔止要friendly，係要soveryfriendly！」
獅子座愛死撐
薛凱琪又說：「我覺得自己唔係咁乞人憎，我係慢熱、硬頸，但其實我唔係好堅強，係獅子座嘅死撐性格，唔衰得。」
愛情篇：
鍾意有內涵嘅怪人
長有一副鄰家女孩面貌的薛凱琪，盛傳拜倒其石榴裙下者眾，她聞言卻大笑說：「我性格都唔似女仔，啲人成日覺得我哋化靚妝、set靚頭，梗係好多男朋友，錯覺咋！呢年幾都冇呀，日日喺屋企做mask，因為好dry呀。公司成日想我錄情歌時諗啲sweet嘢，甜啲、冧啲，但我上次拍拖成兩年幾前嘅事，都唔記得啦。」
問薛凱琪有甚麼擇偶條件？她想了想說：「一定要好心地，大家溝通到，要明白我講乜，要有feel，我鍾意怪啲嘅男仔，重要有內涵。」
採訪：朱倬誼 攝影：陳偉權
場地提供：Joint十五
