黃秋生早前批評元華、元秋演技浮誇及《阿嫂》女主角劉心悠博宣傳後，都指自己的言論被歪曲，並表示不願再接受訪問，但他近日分別接受內地報章訪問時，不但批評周杰倫沒有演技，又批評新城DJ啤梨及范振鋒閱讀能力差及咬字不清，不改其辛辣作風。
黃秋生近日忙於為新戲《頭文字D》宣傳，昨日搜狐網刊登了一則他的專訪，秋生談及在片中飾演其兒子、首次拍電影的周杰倫時，他竟直說：「不能說他有演技，因為他沒有演戲的技巧。」昨日秋生接受本報記者電話查詢時說：「我話佢有演技即係吹牛，但有演技唔代表演得好，冇演技又未必唔好，因為周杰倫冇演技，所以佢好啱呢個角色，好似我之前話元秋浮誇，但佢啱個角色咁。」
錄廣播劇
斥DJ講話不清楚
秋生又續說：「周杰倫係冇技巧，但正因為咁佢唔作狀，佢有天份，做演員最緊要係交流，我喺《頭文字D》主要係同周杰倫做對手戲，阿B（鍾鎮濤）都有啲，佢愈演愈好，最初有少少緊張，但現場同剪接出嚟又唔同嘅，有時現場唔滿意，但出到嚟好好。」
另一方面，秋生日前與鍾鎮濤及余文樂等到新城電台為《頭文字D》廣播劇錄音，新城DJ啤梨及范振鋒也有參與，秋生接受內地《南方都市報》專訪時，不開名地批評與他合作的DJ閱讀能力低，他在訪問中道：「口的配合不行，眼睛又不夠快。其實我是內心覺得很荒謬，都已經是DJ了，已經不是業餘的……我也不是要求太高吧，我只是要求你講話清楚一點，這樣講話怎麼可能去錄廣播劇呢？這樣下去我們的兩代之後就爬回樹上了。」
啤梨昨日在電話中得悉有兩名DJ被黃秋生不點名批評後，他錯愕地說：「唔係呀？咁講又過份咗啲，我諗佢講緊兩個幕後人員，因為當日秋生同B哥哥分開錄，所以要搵一個襟掣同一個寫稿嘅幕後同事讀B哥哥嘅稿，等秋生可以錄得順啲，但佢哋唔係DJ。」
啤梨傷心
錄音緊張唞晒大氣
其後啤梨又猶豫地說：「我覺得佢唔會話我，如果係我就要反省吓先，我會努力吓，但其實我冇乜台詞，因為我做拓海個角色，好沉默㗎。秋生係我偶像，如果佢真係講我，我會好hurt（傷心），佢做戲好叻，如果佢咁講我，我以後唔敢喺佢面前出現。我知佢讀過演藝，要求高，要人咬字好清楚，我知好多DJ都咬字唔清楚，但我咬字清楚喎。」啤梨謂秋生給他的感覺很嚴肅，讓合作的人感到相當緊張，錄音當日大家都不敢說笑，啤梨說：「好大壓力，唞晒大氣呀，嚟多個take都冇，所以算好順利。」
對此秋生昨日在電話中回應說：「點解要話好hurt呢？作為DJ、作為偶像、作為榜樣，如果俾人批評就話好hurt，就話死嘞，咁香港嘅偶像歌手咪死晒？俾人批評，檢討先有進步，咁先唔會嘥咗我批評嘅功用，唔一定要有專業能力，但一定要有專業態度，邊個未俾我鬧過吖？我鬧過余文樂、鬧過Edison（陳冠希），你睇吓人哋進步咗幾多？你同佢講，我講嗰個係佢，佢咬字唔清，希望佢努力學好啲，唔係希望佢傷心，我只係想鼓勵吓後生仔。」
對於啤梨指錄音當日氣氛緊張，秋生說：「我知佢緊張，所以當場冇講呀，我講咗驚佢做唔到落去。我唔係介意要take第二次，我係介意人哋唔用功。」
多謝帶挈
范振鋒稱驗耳鼻喉
而范振鋒則表示只與秋生在其中一集內合作錄了數句對白，對於秋生的批評，他不怒反笑說：「我唔會嬲，佢講嘢好搞笑，佢之前有冇批評人吖？俾佢批評過嘅大哥都冇嘢，我哋啲細嘅又未夠班，我哋嘅批評就梗係重勁啲啦。」對於秋生指他們的口與眼都有問題，范振鋒說：「我短期內會搵醫生check吓眼同耳鼻喉，睇吓有冇黐脷筋，搞好身體先，要眼明手快至敢再見佢呢位前輩，我好多謝佢，多謝佢帶挈我哋見報，同埋多謝佢帶畀廣大市民小道消息。」
採訪：張止寒、蔡如玉、朱倬誼
