英國虛擬樂隊Gorillaz最近啱啱推出fans等到頸都長埋嘅全新大碟《DemonDays》，喺張唱片特別版入面重送咗張DVD，收錄咗樂隊嘅新歌《FeelGoodInc.》嘅MV同幕後花絮，非常有趣盞鬼。
一王幾后露股罅
喺《FeelGoodInc.》嘅MV入面，Gorillaz嘅主音2D、低音結他手Murdoc同鼓手Russel被困喺一條巨柱入面，但佢哋就唔多似坐監，反而似開淫亂派對。其中Murdoc就好頹咁同班靚女瞓埋一齊，任由班女撥弄乳頭。
到開騷嗰陣，成日好想做大佬嘅Murdoc，重大搶主音2D同鼓佬Russel風頭。Murdoc起身表演時，唔止露埋股罅，重擺出一王幾后嘅風騷台型。不過，最令人意外嘅，就係成員Noodle喺一個會喺天空上飛嘅小城彈結他，場面都幾似宮崎駿嘅《天空之城》。而Noodle喺解說部份就話天上啲雲係畫師參考好多日本卡通繪畫而成，唔知係咪連個飛天城堡都係參考宮崎駿呢？
此外，DVD入面重有Gorillaz喺MV嘅幕後花絮，2D同Murdoc齊齊赤裸上身喺飛天城堡上曬太陽，Murdoc重話自己其實唔係咁鍾意演出MV，結果俾天上嘅雀仔屙屎落塊面度，引嚟隊員大笑。