林建岳女友Monica開喺中環嘅美容院前晚舉行宣傳活動，林建岳雖然冇嚟，但旗下藝人杜汶澤、何韻詩，以及馮德倫同利嘉兒等都有嚟撐場。
其間阿澤被問到知唔知佢老友余文樂送咗部追蹤器畀佢未婚妻田蕊妮時，阿澤就即刻狂鬧樂仔，佢話：「靠害咩！呢啲滅絕人性嘅追蹤器，離間人際關係，放喺人嘅身上，係唔信嗰個人，被追蹤嘅人會有好大陰影㗎。」阿澤繼續鬧：「毀滅個追蹤器，毀滅埋余文樂，呢啲人心地唔好，重話係兄弟！」不過阿澤同樂仔老友鬼鬼，佢都係講吓笑啫，點會真係嬲吖。
阿詩洩機密
另外，同場嘅何韻詩話知道鄭秀文（Sammi）加盟東亞唱片嘅消息，佢話好歡迎佢喎。對於有傳許志安透過Sammi經理人郭啟華引薦入東亞，雖然安仔否認，但前晚問阿詩會唔會幫安仔搭路時，佢一時衝口而出話：「唔使我啦，咁多人幫佢搭路。」阿詩講完都知自己衰咗。
無綫斥有線擅用長今
無綫早前安排主演韓劇《大長今》嘅韓星李英愛嚟香港，不過李英愛着住韓服出席商場活動嘅照片，前日被刊載喺有線嘅宣傳廣告度，無綫外事部助理總監曾醒明噚日話：「李英愛係應TVB邀請嚟香港，無綫破例畀其他傳媒採訪，但李英愛嘅善意就俾人擅自用嚟作商業用途，我哋深感遺憾，任何魚目混珠嘅行為，都會俾人拆穿。」
Ella拗腰跳舞撻生魚
台灣女子組合S.H.E成員Ella前晚喺台灣拍攝電視劇集《真命天女》，重同劇集入面暗戀佢嘅有錢仔陳志愷一齊跳舞，Ella難得以一身淑女打扮拍劇，佢不時拗腰跳舞，結果唔小心跌親，好彩冇受傷，總算有驚無險。
連生百五萬拍港廣告
喺韓劇《大長今》入面扮演連生嘅朴恩蕙，最近以一百五十五萬港元嘅酬勞成為本地一間化妝品公司嘅代言人，為期一年，原來朴恩蕙入行咁耐未試過收咁多錢拍廣告。
朴恩蕙預計下個月十三至十四號會嚟香港拍廣告，聽講佢之後重會去台灣接拍一套時裝劇，睇呢真係豬籠入水。
