寵物花園：<br>Jump!Jump!Jump!我要做落水狗

寵物花園：
Jump!Jump!Jump!我要做落水狗

天氣熱到嘔，親親金毛會特別舉行游泳活動，接送小巴由觀塘至旺角至青衣，沿途九曲十八彎，避過郊野公園美食的呼喚，終於只有兩隻狗出事──嘔到七彩！消耗膠袋數個，主人心跳超過一百擊，最後都可以順利下水，唞啖氣都清涼啲。

記者：邵超
攝影：梁細權

序曲：搭校巴出發喇～

恕本人大鄉里，一直唔知狗狗都會嘔，唔少醒目主人已經唔餵早餐，希望愛犬避過厄運。青衣至元朗水尾村一段，掟經幾多彎都未跌倒，但一開車門熱風徐徐送來，隻隻即時熱到趴地伸脷。

■人狗一齊逼小巴，好似着便服跟學校去旅行。

■眾金毛望住企喺路邊的阿Pat，隻隻都忍唔住伸吓脷流吓口水。

■英曲天天親民一招，嚇親女士，其實係驚佢的口水。

■史納莎Happy唔係攰到趴地，而係佢上梯級真係無能為力。

■風騷過主人的金毛仔仔，呢招捲舌差少少可以上TVB參加《有招出招》。

為了綠茶撲落水

天好藍，水好清，但撞鬼太陽真係好猛！睇住一隻隻強壯的金毛游得咁開心，齊齊表演游泳比賽都好肉緊。當然賽果係無分勝負，皆因隻隻掛住個追蹤誘餌（綠茶樽或水球不等）左撲右撲，偏離航道個個散水。以致所有指令都出現咗少少訊號故障，人狗不通。

■除個別特別深色外，好佩服狗主認得到自己的愛犬。

■個個阿媽都係咁樣丟個仔落水，諗住佢哋天生識游水，奉勸先着救生衣。

■沙灘拯溺隊成功撈起濕水Happy，佢個樣嚇到懵咗。

■估唔到比賽的誘餌竟然係柚子綠茶，而且有兩條金毛為它爭寵。

■熱到趴水，身為大型犬更加要唞多啲。

上岸唞一唞

雖然寵物樂園唔係建在水清沙幼的馬爾代夫，不過元朗地大物博，小型泳池加埋青草地，度假Feel一樣𠱁到大家好開心。最貼心的服務是提供沙灘用品外，重有救生衣㖭！愛狗如命的主人，唔放心丟隻狗落水，咪畀佢着救生衣游狗仔式囉！認真搞鬼。

■當日隻隻金毛熱到舔舔脷，飲過「鹹水」至返屋企。

■小賣部有齊泳具，救生衣盛惠$10。

■夏天帶大型犬出戶外活動，真係少啲水都唔得，人都會中暑啦！

■寵物樂園有個優美小草地，個個唔使音樂都爭坐呢張木鞦韆搖搖吓。

■北京狗趴趴名實相符一摸即趴，露晒肚皮都要趴。

獎門狗玩到趴地

場地明文規定主人唔可以下水太深，被狗拖落水都唔可以反擊，重要幫牠們沖涼，真係服侍周到。好彩大會安排咗獎門人其中一個節目，就係人狗一齊合作猜謎，狗狗任人擺布都唔知發生咩事，算係少少補償，唔係「金毛飛」就大晒！

■其實唔係太清楚呢個動作可以估到甚麼字，不過這位會員確係投入到騎住愛犬。

■金毛會阿Pat的愛犬頭一胎五隻BB已經長大成狗，同會員搞呢個水運會慶生。

■唔知係會員太聰明抑或題目太淺，幾乎條條都估中，笑得幾開心！

■免費狗狗出浴鏡頭，四仔應該唔會收錄。

夏日帶狗出遊須知

金毛尋回犬是大型狗種，性格溫和，鍾意親近人，屬「被拐」高危目標。好動的牠們最喜歡游泳和叼飛盤、接球，但香港夏天的太陽特別熱情，出外時小心避免中暑，要帶備足夠的水和做足防蚊蟲措施。搭長途車就要避免上車前進餐，不幸愛犬暈車浪就大件事。雙層披毛容易脫毛，每星期梳理幾次就少不免，下水後亦應即時沖涼，免致着涼及要補充水份。

鳴謝：親親金毛會（www.mancreampoodle.com）