煲呔出戰，問鼎特首，的確架勢好多，首先佢老哥表現輕鬆，其次係全情投入，第三有高人指點，第四就係擁躉唔少，咁短時間組到一隊國際星級聯軍，認真厲害。
鍾士元大讚醒目
八方問曾經同煲呔共事多年嘅政界中人，佢哋都一致認為煲呔手段同功力唔簡單，要喺眾多政務官中打拼出頭，絕非易事，連政壇教父鍾士元都喺人面前大讚佢醒目。呢句話可圈可點，醒目係香港人嘅特徵，阿媽成日都話，執輸行頭慘過敗家，所以香港仔同香港女一般都較其他地方嘅人反應快，永冇執輸。
煲呔強項就係識入馬廐，由夏鼎基、霍德到麥高樂、陳太，佢個個都湊得掂，無他，有邊個老細唔鍾意啲馬仔超級勤力同忠心？當然老董主政之時將佢投閒置散，降為全城清潔大隊長，但係佢好似越王勾踐咁，人哋卧薪嘗膽，佢就在家練高球，結果守得雲開見廖暉。
林彥明暫停助選
不過，𠵱家黃袍加身都要跟足程序，所以煲呔係咁意都要成立個競選辦，搵叻人幫手，做場好戲。李國寶做辦公室主任，陳德霖做秘書長，下面嘅公關大隊已到位，由新聞處前助理處長丘福生當新聞秘書，兩間英美大公關公司各派要員出馬，黃麗君負責策略，游淑儀睇宣傳，分工好清楚，至於同煲呔老竇相熟嘅林彥明，噚日公司突然急召回去，要暫停助選工作，行政同聯絡工作尚要叻人幫手。
傳真︰2623-9278
電郵︰[email protected]
