投資熟手女工靚師奶以往係投資經紀，搵夠咗，索性唔do，送完個女去英國讀寄宿學校之後，得閒得滯，心思思重出江湖，做其業餘投資家。唔係炒家噃，因為佢買隻煤礦股，一揸就三年，永唔會今日買聽日賣。最近呢位靚師奶成日話恒指會下試一萬三千三百點，唔肯入市住，點知佢嘅老爹不停聽到「貼士」，叫佢買呢隻、買嗰隻，靚師奶為之苦笑。佢話想起昔日賓架Ｙ叱咤風雲，上《亞洲華爾街日報》頭版，在投資銀行界紅極一時，居然俾阿媽教買股票，Ｙ阿媽話係從跑馬地街市聽到「人哋話」嘅喎。
老人家好鍾意對仔女講：「人哋話……」邊個係「人哋」，一個人或者幾個人，老人家通常講唔出。靚師奶老爹朝朝去蓮香飲茶，早上蓮香係退休長者大集會，內有不少藏龍伏虎，好多錢買股票。某日老爹對靚師奶講：「人哋話，××酒店會好掂，可追入多少。」靚師奶於是當天留意隻××酒店，唉吔，股價一日就跌咗兩三成。
呢日「泰昌」蛋撻暫停營業，唔知有冇辦法另覓新址，繼續經營。靚師奶聽到「人哋話」嘅線報，九如坊之九記牛腩，舖仔細細，已以九百萬元售出，新業主唔知會唔會大幅度加租，令九記牛腩遇上泰昌蛋撻同樣命運。連接中環蘇豪區附近地區嘅舖位，唔知點解突然有價，猛咁升。呢一帶有好多陳年老店，各有特色，聲譽好唔錯，如果一一被租金逼走，換上千篇一律賣手機、時裝、金飾，咁就冇厘味道咯。
地舖租金正走入一個上升循環，遲早會跌番落嚟。你睇吓隻一七八（莎莎），今年股價最高見過四個三，寫呢篇稿之時，做緊三個五毫半，跌咗一成七，零售股高峯已過，應該冇能力支付更高嘅租金嘅嘞。