父親節將至，恒基為催谷十一個商場人流與消費，未來四星期，花費一百大元就可以抽獎，頭獎雙人頭等機票來回東京，二獎係麗嘉酒店雙人總統套房一晚，三獎都有雙人富臨飯店鮑魚豪門宴。
恒基話：「考慮到一般市民都未有坐頭等機位、入住總統套房經驗」，希望帶畀顧客獨有嘅優越感喎。
諗落又係，啲商場全部位於新界新市鎮，出入嘅主要係「一般市民」，好少咁豪。恒基預計，商場人流可以增加一成，租戶生意多一至兩成，租金就係後話。
至於西灣河嘉亨灣，嚟緊首一百名買家，會獲贈祖雲達斯對傑志貴賓波飛兩張，同祖雲達斯來港球星簽名波衫一件。
利息貴冇乜人睇樓
銀行上周宣布加息，上周末預約睇樓即時倒退，𠵱家係加息生效後第一個周末，情況又點呢？利記報告，五十個屋苑只得二千一百五十九組客戶預約，較上周末再縮水七點一巴仙。
新界較差，減少八點二巴仙；當中以粉嶺中心、上水中心同將軍澳中心最慘情，同減五成。不過，部份屋苑反而多咗人約睇，馬鞍山新港城增加三成九，最好景。
利記曾慶望話，投資者因集中出貨，唔得閑睇樓，預約大減。
另外，港置方家輝話，市場人士預期，樓市第三季後再展升浪，因此近期較多買家改為暫時租樓住，睇租盤嘅，由上周佔總預約一成，升至本周佔四成，主要物色半年至九個月嘅短約盤。
紅磡商業中心筍價轉租
寫字樓租金飆升，不過仍然有筍盤，好似明愛旗下嘅教育機構，剛以月租三十八萬，同華懋承租華懋紅磡商業中心全幢，呎租大約八蚊，拍住工業樓咁平。
中記舖位部顏劍青話，租金同上手另一間私人教育機構差唔多，之前嘅租金，喺三年前簽落，𠵱家新租客一簽就六年。幢物業似乎幾旺教育機構喎。
紅磡商業中心喺漆咸道北，大約四萬八呎，有成二十幾年樓齡。
中記重代理標售沙田娛樂廣場四樓嘅兩萬呎酒樓，約值五千萬，七月中截標。
電郵地址：[email protected]
