恒指彈升144點，33隻成份股，獨滙控（005）無升跌，其他32隻皆有進帳。藍籌三兩格變化，相關窩輪如屬槓桿率大者，波幅或升幅，可達50%甚至逾100%，例牌成交金額唔大。食得鹹魚抵得渴，炒呢類輪大贏大輸，如果時日無多者，去到尾，多數係咁先。末日輪，免得過咪炒。
長實C輪3560：長實（001）最多升1.25元，埋單升0.75元。末日C輪3560前日1仙，昨最高2.1仙（即係升110%），埋單1.5仙，升幅50%。6月14日夠鐘，6月8日最後買賣，即剩番8個交易日買賣，行使價72元（正股𠵱家70元），隻輪相信最後瓜多過菜。
和黃C輪3561：和黃（013）最多升1.25元，埋單升0.50元。末日C輪3561前日2.4仙，昨最高4仙（即係升67%），埋單3.6仙，升幅50%。隻輪同3560一樣，都係剩番8個交易日買賣，溢價2%，較3560溢價3.1%低啲，相對上生存機會大過3560少少。
江銅C輪3947：江銅（358）升3格，收3.525元，C輪3947高收2.9仙，升123%，有82萬份易手，有人喺度玩死亡遊戲。隻輪唔係末日貨色，9月初先至夠鐘，不過行使價4.70元，正股現價3.525元，要升上行使價，機會好微，所以隻輪最後去咗嗰頭嘅機會好大。3個月前喺95仙上車嘅，甚可憐。
中企C輪3716：國企指數升1.6%，中企C輪3716彈跳67%，有82萬銀嘅主人喺度玩死亡遊戲。隻輪下月底夠鐘，溢價5.8%。國企指數要喺19個交易日內升270點，難啲啩？
章盛