前晚利物浦同AC米蘭喺土耳其爭歐冠盃，矚目程度唔使多講；偏偏俄羅斯呢個東歐國家，無論國內球圈人和事，都好似住喺另一個足球國度咁，漠不關心。
該國傳統勁旅莫斯科戴拿模，就揀正跟歐冠盃決賽差唔多時間，為三位啱啱喺波圖簽入嘅球員，包括中場文尼治、哥斯甸亞及後衞沙達尼迪斯舉行加盟記者會。相信到會嘅國外傳媒應該有限，人人都走晒去做歐冠盃啦！
至於俄國大爺阿巴莫域治，亦冇話飛去土耳其睇決賽，選擇留喺俄羅斯，現場睇莫斯科中央陸軍鬥辛尼特嘅俄羅斯盃準決賽。乜歐冠盃對佢哋真係咁無吸引力咩？
講得出做得到頂叻
AC利記教頭寸得起
一般領隊及教練喺賽前實有唔少對爭勝充滿信心嘅「行貨」說話；好似AC米蘭教練安察諾堤及利物浦領隊賓尼迪斯咁，前者喺歐冠盃決賽前，話只需三分鐘就可撕破「利記」嚴密防線；賓尼迪斯亦回應佢哋唔會踢悶波，起碼入到AC兩球！結果兩樣都中晒，抵佢哋咁大口氣！
AC輸波愁雲慘霧
雙基際遇都咁傷
AC米蘭喺歐冠盃捉到鹿唔識脫角，成個陣營愁雲慘霧，不過最失意係連後備名單都無份嘅恩沙基。其實基仔之前幾場聯賽都寓賽於操，以為有機落場，結果教練肥安以戰術理由唔用佢；不過省入兩粒嘅基斯普亦唔見得好，諗住做捧盃英雄可以留低，家陣嘅前途就難明朗囉。
踢洲國盃喊冇假放
大哨態度唔要得
朗拿度好波，態度就認真麻麻，佢話不滿要踢今夏洲際國家盃，因為出年再踢世界盃，連續兩年無假放喎；佢又唔講吓前年洲國盃同埋舊年美洲國家盃都免役？佢應學吓李華度，人哋繼希臘盃後，日前又入波幫奧林比亞高斯贏聯賽錦標，𠵱家目標再踢國家隊，比「大哨」有心。
第4度超速被官狠批
李奧罔顧安全抵鬧
李奧費迪南今年一月超速駕駛，日前判咗釘牌二十八日同罰款一千五百鎊，今次已經係佢出道後第四次被抄牌，而主審官今次重狠批李奧，話佢身為公眾人物，應該有良好形象畀青年人作為榜樣。我求大俠知道李奧鍾意揸車享受人生兼減壓，但都要顧及路面安全！