煲呔選特首，第一日開畫：行政會議人員，由最細嘅陳智思帶頭，周一嶽附和，重有梁愛詩，紛紛幫口，響應老霍吹雞大行動，紛紛表態挺曾攬權嘞！
陳智思係行政會議最細嗰個，而周一嶽就係「問責局長」之中嘅新嚟新豬肉，兩個都冇乜份量！按我國傳統長幼尊卑程序，向老人家拜壽，要長子嫡孫帶頭，二三仔跟住，姑嫂妯娌第三批，丫環花王包尾！
妹仔花王爭住嗌口號
行政會議挺曾攬權拜壽大行動，係咪應該由召集人行頭，即是振英哥率領三司十一局企第二行，政黨人物如田少、曾鈺成、鄭耀棠，負責企兩翼，收風睇水，維護治安，而陳智思、查史美倫呀咁，應該輪到最後先至嗌口號至啱！
現時妹仔花王，反而響口先，啲長子嫡孫，反為斯斯縮縮冇晒影，咁嘅迹象，好唔尋常，證明煲呔參選呢台戲，男主角最落力，但啲配角及甘草演員等，一係企錯晒位，一係唔照劇本念台詞！
重未計班公務員㖭！原來有班公務員，重好唔妥煲呔，宣稱煲呔係都要推薦愛將前新聞秘書朱曼鈴坐正環境運輸及工務局乙級政務主任，並瞓身寫信畀高官晉升委員會力讚！
點知，高官晉升委員會竟然唔畀面，以朱小姐做副秘書長未夠一年為由，予以拒絕，重乘勢將單新聞踢爆埋，若然煲呔身為公務員阿頭，「扶正」一個愛將都冇力，咁呢個「公務員治港」嘅格局，又點樣維持？土共左佬，加埋自由黨，重唔乘機裏應外合，大舉插曾？
暗流洶湧要煲呔試刀
都未坐正，經已暗流洶湧，公務員即時玩玩佢煲呔，試一試刀！正所謂「攘外必先安內」，煲呔外有土共、自由黨、民主黨搞局，若然內又有一班唔係咁順超嘅公務員吓吓玩嘢，咪連廢董都不如？壽爺猛話「穩定和諧」，睇落都係一場空咯！
淨係晉升公務員一樣，係公務員事務局話事，定係公務員嘅特首話事？特首話升人，「公事局」公事公辦係都唔升，你吹咩？喺出面請人空降呀？嗰個外人隨時變阿松，今次頭痕咯！
傳真︰2623-9278
電郵︰[email protected]