水貨狂人UA強，呢幾年全靠走日本水貨撈埋唔少。𠵱家班偶像出親鏡都着日本牌子充當人肉廣告牌，連「游水F」都着NumberNine，可想而知街頭時裝勢勁，UA強生意亦豬籠入水。最近有傳佢買凱旋門單位投資，立即打電話求證，UA強聽後回應：「好小事啫！見手頭上Cash多，咪買個千零呎單位玩吓囉！本來諗住買夠兩個，點知我銅鑼灣間舖業主放晒風要加租，逼住留起部份資金第日用。你知喇，我間舖轉角就係香港舖王，即賣雞蛋仔嗰間呀，咁我個業主點會唔乘機加番我租？好彩𠵱家興『游擊店』，自從GARCONS同SillyThing於柴灣開咗間GuerrillaStore後，話明每年搬一次，以游擊戰略搞新意，咁我哋咪有樣學樣囉。𠵱家銅鑼灣、旺角班舖家，萬一加租太勁或被人逼遷，就可以用『游擊店』做藉口搬舖，夠晒體面喇。好似糖街賣玩具個『公仔劉』，剛剛約滿，又係被人加租，頂唔順囉，咪同外面講自己間舖係『游擊店』，聽落係咪舒服好多呢？」UA強之言實在有理。只不過，GuerrillaStore只此一間，其他生意人好難模仿。
主持人：大食Jack
八卦熱報：[email protected]