中銀香港噚日假會展舉行周年股東大會，董事長肖鋼專程從北京來港主持，今次行方安排佢喺會後企定定接受傳媒訪問，認真德政，唔使好似去年咁搞到要追追逐逐，人仰馬翻。
會議其中一項議案，係重選副董事長孫昌基為董事，唔知點解，現場嘅即時傳譯，竟然譯錯咗為重選「孫中山先生」為董事，即引來全場哄堂大笑，連坐喺主席台上嘅和廣北總裁，同埋非執董馮國經都忍唔住大笑一餐。另一項議案係通過羅兵咸為核數師，估計負責「做媒」提議通過嘅員工，唔知係咪一時緊張，講完「本人」之後就忘記台詞，擘大口得個窿，認真搞笑。
傳真︰2623-9278
電郵︰[email protected]