港股持續牛皮，恒指收報13569，升7點，成交104.76億元。不過，國企指數受到中石化（386）下跌，以及中海發展（1138）慘遭拋售勁挫逾4%拖累，因而下跌36點至4501。
東強電子（615）官司纏身，對手係財雄勢大的飛利浦，牌面輸咗一截，噚日復牌股價大插22%至0.385元，成交580萬元。今次東強被飛利浦告侵權，但旗下公司則告飛利浦壟斷，索取巨額賠償。除非東強索償勝訴，否則淨係法律費用都相當襟計。
海爾電器（1169）表明將獲注入青島海爾的資產，消息刺激股價大升15.13%至0.175元，成交金額達3458萬元。最近獲鎮科老閭吳鎮科入主的華基科技（859）亦大升33%至0.69元，市場主要憧憬鎮科珠寶好快會借華基個殼上市。
新濠路演不合時
市場對於濠賭股的熱衷已大不如前，兩隻重本投資的賭業股新濠（2981）及澳門實德（487）惟有主動出擊，據聞即將進行路演，向芬佬推介本身在澳門的賭場及娛樂事業發展。但近期3大國企新股正密鑼緊鼓進行招股活動，成為市場焦點，大市成交亦因而萎縮，睇嚟兩股現時路演似乎時間唔太合適。澳門實德冇起跌，收報0.77元，新濠跌1%至9.50元。
實惠（996）向澳洲公司澳昌科發行1.08億元可換股票據，變相引入澳昌做第2大股東，票據可兌成實惠約20%股權，照計屬於利好消息，但睇真啲，原來行使價只得0.45元，比停牌前報價0.96元大幅折讓53%，噚日即時嚇親街坊，股價不升反跌，收報0.89元，跌7.3%。大股東時富投資（1049）更大跌10%至0.40元。
阿虎