唔好以為讀工程嘅大學生講嘢一定口窒窒，八方噚日喺城大就遇到兩個好醒嘅學生，一個叫周展耀，另一個叫郭鳳儀，佢哋兩個都係城大物理及材料科學系副教授胡志文嘅高徒，胡博士最擅長教學生「查找不足」，用飛行服務隊直升機撞山、地鐵裂軌嚟做教材，做「失效分析」，搵出事故嘅原因。
胡博士又要啲平時好少面對群眾嘅工程學生做presentation，等佢哋口齒伶俐啲，胡教授更因此獲選為五名傑出教學獎嘅得獎者之一。
另一位得獎教師係西班牙籍嘅AngelGarralda，佢四年前喺城大開西班牙文班，又搞西班牙語午餐聚會、暑期交流課程，重安排學生去西班牙公司實習，最厲害係佢一手一腳咁搞咗個西班牙學習網頁，拍咗十五套片，重粉墨登場㖭。佢咁瞓身，得獎都係實至名歸。
傳真︰2623-9278
電郵︰[email protected]