曾蔭權「提早」在星期三辭職，但傳媒並冇倒瀉籮蟹。除咗港台搶先預報，無綫亦準備好專輯，重攞咗七點半黃金時段，直播煲呔辭職宣言，之後就重溫煲呔歷史，好詳細。不過，唔知點解唐英年（圖中）跟住煲呔之後出嚟見記者，無綫只係眨一眨就算，假假哋都係署理特首，咁唔畀面？
但係聽完唐司長答記者嘅說話，又好似明白無綫用心。人人都傳唐唐兩年會挑戰煲呔，但唐唐竟然自己話「曾蔭權比佢更適合擔任特首」，咁係咪即係投降？有人問兩年佢會否參選，答案竟然係「問曾蔭權」。喂，你自己選唔選，要問過曾蔭權？
自由黨在選委會有足夠提名票，可惜冇人夠膽企出嚟參戰，反而四圍搵藉口落台。咁點做執政黨呢，如果唔想執政，又組黨嚟做乜？
傳真︰2623-9278
電郵︰[email protected]