香港大學接受李嘉誠基金會捐款十億元，港大校務委員會一致通過將港大醫學院命名為「李嘉誠醫學院」，引起三十位醫學院校友反對，一位謝鴻興醫生在記者招待會大罵：「只怪家門不幸，出敗類，這班人（指校務委員會）財迷心竅，數典忘祖，見利忘義……」
於是左丁山有興趣知道，謝鴻興醫生口中所言嘅一班敗家仔，究竟係乜嘢人。一上網就搵到，港大校務委員會係港大最高權力機構，一共有二十二人，其中學生代表出缺，研究生代表有一個。呢班人之中，名人甚多，左丁山一眼就認出畢業於港大嘅名人有陳兆愷（終審庭法官）、柯清輝、蘇澤光、黃乾亨、張永霖、周文耀、顏金施、黃子欣、梁智鴻、范鴻齡、陳文敏。嘩，粒粒皆星噃，直情係港大校友名人榜，其他名人重有主席馮國經、校長徐立之、大教授王于漸、馬會董事鄭維志、前滙豐高層施德倫。
呢批人會係香港大學敗家仔？幾難相信噃。柯清輝係恒生銀行CEO、周文耀係港交所CEO、蘇澤光係電盈CEO、黃子欣係偉易達主席；范鴻齡係中信泰富阿二，東隧加價一役，智勝廖秀冬；顏金施賣貝沙灣，奇招迭出；梁智鴻別號金刀梁；馮國經、鄭維志將家族企業發揚光大，數一數，以上全部係香港叻仔叻女，搵錢叻到冇得頂，點會敗家呀？你估淨係醫生識搵錢咩，呢班人搵錢能力勝過三十位反對醫生加埋晒。
港大校務委員之集體智慧，肯定高出好多個大藍籌公司嘅董事會，如果將佢哋搬過去做一間上市公司董事，公司股票一定上揚。左丁山冇資格做港大校友，如果我僥倖係，一定信呢班委員多過信嗰三十位醫生。