爆機狂迷：<br>炸彈人DS一帶8打聲控炸人嗌到BOOMBOOM聲

爆機狂迷：
炸彈人DS一帶8打聲控炸人嗌到BOOMBOOM聲

由細蚊仔已經玩到開巷嘅《炸彈人》，幾乎同《烏蠅機》、《太空侵略者》呢類ClassicGame一樣，成為每代主機必出佳品，到家吓嘅NDS同PSP當然亦唔會例外。話明硬Sell遊戲性同創意，比起玩益智嘅PSP版本，NDS《炸彈人DS》不單止還原基本步、擺明車馬用傳統炸人方式做賣點，佢竟然重玩埋雙螢幕、WiFi連線同個「咪」㖭！既然《任天狗》𠵱家已經OutOut哋，重唔嗱嗱聲玩《炸彈人》，重點算係InGamer呀？

文：福田
攝影：陳陶鈞

唔講大家可能唔知，喺《炸彈人DS》未推出之前，各個新聞組已經掀起一片討論熱潮，就連㗎仔整嘅假相都呃到唔少人，以為提早空運到港，搞到啲機迷仆崩鼻咁周圍撲貨。直至上星期二，真身終於嚟咗香港，不過由於來貨甚少，炒味極濃！首賣日曾谷上$350！不過一樣俾人掃清；呢幾日再有新貨返，貨量一般，但Game價已回落到$299合理水平，絕對係入貨好時機。

■有WiFi真係好，隔成條樓梯都Link到機，玩起嚟亦唔太窒。

最多8人連線齊齊打

《炸彈人DS》到底有咩咁受到人追捧呢？原來只要有一部機開住佢，另外7個人唔使入遊戲帶都可以進行連線對戰，最啱成班人出嚟玩時「攝」時間用！須知超人氣嘅對戰方塊Game《Meteos》，頂多都只係一帶4打咋。
經過筆者實戰測試，無論係隔成十幾米遠Link機，抑或8個人企到離行離列咁玩，除非俾成幅牆遮住，否則連線效果都好滿意。諗番起差唔多十年前嘅SS版，啲公仔縮到豆豉咁細粒至做到10人一齊打，重要插兩個分線器，𠵱家咁方便就玩到，真係爽死！

■呢款《炸彈人DS》最着數嘅地方，就係可以「一帶8打」。

■上下畫面走嚟走去，又要避彈、又要炸人！

■一人一隻色，8人對戰之前要認清楚。

■除咗隻揪，單挑7個電腦都得！

殺人放「彈」　靠吹「咪」

除咗WiFi連線呢個NDS新穎功能之外，《炸彈人DS》重用埋佢個咪同下面個TouchScreen嚟玩，講真都算係玩盡部機嘅焦點功能。
先講個咪！喺特定嘅對戰版面，玩家係可以選擇呢個功能嚟用（故事模式就唔得喇！）關於咪嘅用法合共有三種，分別係設置炸彈、引爆炸彈及架起盾牌，例如設置炸彈就係對住個咪嗌一聲「Boom」，想簡單啲嘅話直接吹氣亦得，咁嘅話就會即刻掉個炸彈出嚟。引爆炸彈就好似以往嘅遙控炸彈咁，放完炸彈之後只要睇準對手經過，吹吓個咪佢就會即時爆炸。
至於架起盾牌則係抵擋炸彈嘅救命符，喺快要被火燄燒中嘅危急情況下，「一吹咪」！炸彈人就即刻舉高盾牌擋住啲火。另外遊戲亦用上TouchScreen，單人玩時係選擇道具之用，對打時就係喺敗者復活環節當中，調節發射場外炸彈嘅力度。

■會用咪嘅除咗設置炸彈之外，重有即時引爆同架起盾牌作用。

■NDS內置咪敏感度極高，輕輕吹，都好少Miss！

學《Quake3》玩搶旗

《炸彈人DS》主要分為單人進行嘅故事模式，以及跟朋友或者電腦決鬥用嘅對戰模式。前者合共設有10大區域100關，每區尾聲都有體形巨大嘅波士，成功解決到佢先至可以進入下一區。
較特別嘅係道具並非即取即用，需要按下面個Screen至用到，咁樣做就可以俾玩家平時儲多啲道具，儘管一個唔小心死咗都能夠即時強化番能力。
而喺對戰模式，除咗平時熟口熟面嘅玩法之外，今集重加咗類似《Quake3》搶旗模式嘅「搶皇冠」，同埋盡量爭奪最多顏色地盤嘅「版圖戰」，大幅增加遊玩時嘅腦筋運用，唔再一味「死炸爛炸」。