渾渾噩噩又一日，恒指高低波幅48點，埋單升7點。以指數睇，表面和平，但窩輪炒家，身家計落普遍唔見多少。市況唔明朗，不賭是贏錢。成日對住報價機者，最好喺報價機邊邊貼個「忍」字。手痕要賭，賭雞仔注算數。
和黃C輪4721：和黃（013）牛皮，企定喺66.50元。牛得真係好交關，高價66.75元，低價66.50元。炒輪最怕正股牛皮，怕溢價收縮，怕輪價陰陰吓，隔幾日發覺原來又輸10%。
等和黃變化之後先至做嘢，做買C輪嗰便，等正股回落1-2元，喺低位買C輪4721博反彈。隻輪10月下旬夠鐘，輪價44.5仙，溢價5.2%，槓桿率14.9倍（有效8.7倍），引伸波幅23%。
想搏殺啲，揀3936，隻輪壽命短少少，溢價高啲，爆炸力（同殺傷力）勁好多。
和黃P輪4764：和黃如果唔跌1-2元，反而升1-2元，則反手喺低位（指輪價）買P輪，博正股唔惡得去邊，升完就跌，對象係4764。隻輪11月初到期，輪價40仙，溢價3.8%，槓桿率16.6倍（有效8.8倍），引伸波幅14%。和黃輪，P輪唔多，交投亦較為淡靜，4764成交金額兩球2，原來已經係最旺嗰隻。另1隻較接近4764嘅，係4944。
章盛