八方今日收到N個讀者電話，話覺得尊子筆下嘅「煲呔鈔票」漫畫好過癮（刊登喺噚日《蘋果》A2版），但就唔多明箇中含意，八方立即捉住尊子問個明白。
漫畫左上方嘅「必胜」同東亞銀行logo相信唔使多講啦，「11SEC.」代表煲呔榮獲胡主席握手十一秒，想唔必勝都唔得啦。左邊水印下面嘅鯉魚就寓意煲呔鯉躍龍門，咁當然養錦鯉都係佢嗜好。至於右上方，「BT8888」梗係唔係非法下載嘅BT，係煲呔（BowTie）嘅縮寫。右邊嗰隻BabyBo皮鞋，八方就唔知點解硬係聞到啲法國巴黎鞋油味喇。
但八方有樣嘢諗極都唔明，點解張銀紙係一百蚊，唔係一千蚊？唔通尊子覺得煲呔一千蚊都唔值？原來，據尊子解畫，「100」唔係面額，而係煲呔值一百分咁解！有人話過，冇咗老董嘅日子好悶，依八方愚見，凡事睇你點睇嘅啫，係咪？
傳真︰2623-9278
電郵︰[email protected]