昨日大市波幅只得48點，總成交100億多少少，真係悶到抽筋，但經紀黃話個別質優股份，其實有得諗。
例如去年年底上市的餐飲股福記食品服務（1175），近期股價顯著造好，炒作理由之一就係剛剛獲得手機生產商富士康（2038）的膳食服務協議，向富士康幾萬名員工提供服務。據講呢張單傾咗好長一段時間，但最終都搞到手，可令福記營業額增加唔少。
至於另外一個炒作原因，就係福記年結日喺3月底，全年業績估計會大約在下個月公布。根據福記的招股書預測，截至今年3月底止，年度盈利將不少於1.59億元人民幣，即係較去年上升92%。聽聞公司應該可以達到目標，甚至會好過預期，所以家陣有人密密收貨唔出奇。
福記去年底上市以來，股價最高見過7.95元，先前一排回落至5元水平，但近排穩步回升，昨日升6.7%，收6.35元。
慕容小初