加租潮一發不可收拾，個個業主當正自己間舖係金礦，旺區銅鑼灣、尖沙嘴和旺角平均加幅最少50%，部份更離譜到150%。近年唔少老店或有特色店舖都要被迫離場，幸運者像六四吧變七一吧，樂文書店搬上唐三樓，像剛結業的泰昌餅店，則要煩惱搵舖問題。今時今日要創業，真正有難度！
記者：邵超
攝影：何家亮
模特兒：KarenSze（Zlect）
肥彭蛋撻執！
排頭位街坊偉哥：「好多人淨係問蛋撻好唔好味，好少人留意到加租對社會的影響。」
旺角銀龍捱！
銀龍發言人：「最近業主肯平少少租番畀我哋，加租後利潤只能應付營運開支，無得賺！」
樂文書店搬！
樂文書店老闆林小姐：「前業主利字當頭，點都唔肯開價，我估佢諗的唔止係天價，係『癲價』。」
大控訴港青Taste大倒退！
「你好難怪香港新一代咁短視，因為佢哋只可以同『自由行』一樣，望到邊個大招牌就行去邊買嘢。加租加成咁，其實商舖俾大品牌壟斷，細舖營運困難，被逼摻啲大眾化的貨品，漸漸失去細舖應有的特色。稍有創意的細舖又好快俾人抄到爛，年輕人無新嘢衝擊，太貴又買唔起，後遺症簡直係Taste大倒退，遲啲大家可能向大陸睇齊，方便去Disco𠝹女！」一個不願上鏡的潮舖店主說，以上一番說話屈咗好耐，但所有店主都敢怒不敢言，驚見報後業主藉機玩嘢。
業主未必贏
近大半年興炒舖，大業主又興將已老化的商場重新間成細舖博貴租，個個打年輕人主意，好似買到旺區舖位實發達，其實不少業主都打錯如意算盤。東角馬尺EmergencyRoom店主Joe：「獨立業主租出就算，無乜規劃，好似總統、銀座、重慶站的業主同租客都慘，咁加租法只夠交租無得賺，根本香港經濟未夠承接力，買嘢的人重少過上年。」
加完租都好靜！
旺角、太子：現時點、始創中心二、三樓
尖沙嘴：重慶站、UpdateMall、百利商場
銅鑼灣：銀座商場地庫、名店坊
邊度有平舖？
創業首選是人流至旺的銅鑼灣、尖沙嘴和旺角，其次是旺街如西洋菜街、百德新街、廣東道等。但旺等於貴，雖說現時樓市升幅亦未回到九七水平，但唔代表所有行業受自由行帶動，我又唔信自由行會走去泰昌食件撻！近期銅鑼灣、尖沙嘴、旺角俾大品牌和國內品牌插晒旗，打開報紙亦有不少新場招租的廣告，銅鑼灣就係一個典型例子。新場有小南國原址轉型的銅鑼商場、銅鑼坊，至於怡東流行通和隔籬東角馬尺就唔理店主賺定蝕，分別在六月及十月被業主收回重新裝修及定位，應該都係拆細勁貴租。潮流興吖嘛，有心創業可以等吓！
銅鑼灣等細舖放租！
銅鑼灣商舖空置率低於5%，靠近SOGO的金百利WaitingList排到半年後，平均呎價去到$150-$200，部份旺場拍得住同區的時代廣場高層商舖。
東角馬尺租客遷徙至黃金廣場、總統商場、蘋果商場和銅鑼灣廣場，部份流放至天后及北角，與潮舖的「潮」字相隔萬重山。
參考租金：
銅鑼灣地帶：約$200?呎
皇室堡：約$150?呎
蘋果商場：$9,000?70呎
尖沙嘴殺返去百利！
傳聞尖沙嘴加連威老道會搞行人專用區，該區有好多炒家加入，租金狂升50%至80%，不過點都估唔到水盡鵝飛的河內道升幅竟達150%，跑贏大市。潮人集中地利時商場因為全是獨立業主，各家自掃門前雪，近排狂加租將租客趕去百利商場，令百利呢個死場又回復生氣，宣傳單張話51萬就可以做百利220呎業主，$3,000至$4,000就可以租到接近300呎舖，重係全包㖭！新創業人士不妨去百利巡吓。
參考租金：
加連威老道 雙號舖$200至$200餘?呎
加連威老道 單號舖$100餘?呎
旺角你唔使諗！
自由行令西洋菜街旺上加旺，搞到連上樓舖租都狂加租，二樓書店大受影響，一條街淨係百老匯、鐳射影音已足夠遮住你對眼。呢條街的租金全球數一數二，好似24號賣熟食的津味小食，百多呎月租$113,000。呢條街傳聞重會大執位，連大品牌都有機會離場，想創業諗都唔使諗！
參考租金：
西洋菜街33萬?間
旺角中心$200餘?呎
Chic之堡$50?呎
