鄭中基早排先後同女化妝師以及陳小韻傳緋聞，重俾人話佢「賤男」，連楊千嬅都睇唔過眼寸佢，叫佢用「賤男」做電影主題曲嘅歌名，估唔到鄭中基一早錄咗首《無賴》嚟做《龍咁威2》嘅主題曲，同「賤男」有得揮。呢首歌可以話係唱衰自己嘅歌，但明眼人一睇就知鄭中基係憑歌寄意，唱嚟冧蔡卓妍（阿Sa）。
鄭中基特登搵寫《爛泥》嘅李峻一幫佢填詞，歌詞內容有啲都幾到肉，好似「我間中飲醉酒很喜歡自由，常犯錯愛說謊但總會內疚，遇過很多的損友學到貪新厭舊，亦欠過很多女人」。
「不忍心偷偷作怪」
雖然歌詞將自己踩到一文不值，不過講到尾鄭中基其實都係用歌冧女友，因為歌詞重有幾句「但是仍惟獨你愛我這廢人，出錯你都肯去忍」同埋「為何還喜歡我，我這種無賴，是話你蠢還是很偉大」等讚賞對方嘅說話，而最關鍵嘅就係有「但是你死都不變心跟我笑着捱，就算壞我也不忍心偷偷作怪」嘅歌詞用嚟表白自己，即係早排有好多偷食緋聞但自己就冇出軌。鄭中基特登做咁多嘢去冧阿Sa，唔知阿Sa又會有乜嘢感受呢？
Sammi千萬身價簽東亞
鄭秀文（Sammi）嘅經理人郭啟華日前證實Sammi下月十一日正式加盟林建岳嘅東亞唱片，Sammi過檔會得到千萬酬金，身為老闆嘅林建岳重會動用三、四十萬，同埋出動私人飛機接Sammi由香港飛去上海簽約㖭。郭啟華重話Sammi嚟緊會兼顧歌影雙線發展，一年會出一張唱片同拍兩部戲，實行貴精不貴多。
徐若瑄反叛飛車黨嚇壞人
徐若瑄最近推出新唱片《狠狠愛》，其中喺一首歌《歐兜邁》嘅MV，佢重着上黑白紗裙同魚網絲襪騎喺電單車上，有型有款，佢用國語話：「我年少時很愛搞叛逆，當時常跟朋友同學一行四、五十輛機車一齊飆車，我們所經之處，人人避之則吉。」
《醫道》剪唔剪有得賭
李英愛主演嘅韓劇《大長今》播完，無綫以《醫道》接棒，但有人話睇完《大長今》對韓劇已經好膩，所以《醫》劇唔係咁收得，首周平均收視有二十六點，即有一百七十萬觀眾收看，但當播到第三個星期，收視共跌咗三點，英國博彩公司易勝博就唔睇好《醫》劇，分別開出咗《醫》劇被刪剪成三十五集或以下，同埋《醫》劇會刪剪成三十六集或以上嘅盤口。
《早熟》徇眾要求加長映期
爾冬陞導演的《早熟》上咗差不多一個月，票房過千萬，以薛海琪同房祖名嚟孭飛成績算係唔錯，不過上個禮拜開始，上映嘅戲院不斷減少，有啲戲院一日只映一場，有啲未睇部戲嘅觀眾不滿，所以向發行嘅新寶院線反映，𠵱家新寶終於徇眾要求，再加到十幾間戲院一日五場播映呢部戲，滿足觀眾。
常盤貴子戀上香港實業家
曾經演出港產片《星月童話》嘅日本女星常盤貴子，最近被傳佢嘅新男友，係一位喺香港居住、年賺二十億港元嘅年輕實業家。日本行內爆料者對日本報章《東京Sports》話：「呢位男子經營十幾間公司，最近重投資拍電影。」據悉呢位實業家上年重請過常盤演出佢間化妝品公司嘅廣告喎。
