上晝11點前，恒指大部份時間都係只跌唔夠30點，之後情況唔妥，恒指埋單唔見157點。期指下周一結算，臨尾可能同4月份唔同，4月份最後幾日挾淡倉，5月份可能會挾好倉，除非美股勁到飛起。
唔做嘢，冇錢搵，但做嘢則或者重弊傢伙。就快轉月份，過多幾日，6月到期窩輪變咗今個月到期，7月份到期變咗下個月到期，心理上不利，溢價再縮多一縮，不利輪價。假設恒指唔郁，揸C輪與揸P輪都要輸，輸在溢價收縮。
恒指C輪4835：最好咪手痕，手痕又要賭個市反彈，買恒指C輪，可以等恒指再跌百幾點，揀一兩隻炒短線，對象係4835，10月尾夠鐘，輪價27仙，溢價2.6%，槓桿率11.2倍（有效8.1倍），引伸波幅20%。暫時買唔落手，係因為昨日只跌5%，跌得唔多夠。另1隻低位博反彈可考慮對象係3921，呢隻波幅大好多。
恒指P輪4858：大市若有技術反彈，彈番百幾點，則做淡嗰邊，買恒指P輪4858，10月尾到期，輪價17仙，溢價2.8%，槓桿率16.6倍（有效9.7倍），引伸波幅17%。
搏殺格，揀3605，呢隻下月尾夠鐘，低溢價高槓桿率，每日上落兩成甚至以上，閒過立秋。
章盛