前日提過，意大利聯賽會無厘頭深化咗條「零容忍條例」，講明意甲煞科日就算完晒場，只要有球迷衝落球場，嗰隊波就判輸○比三；當時我求大俠都話要不得，果然費倫天拿球迷已大鑼大鼓準備響禮拜日對布雷西亞場護級戰玩嘢。呢一刻未知賭波公司開唔開呢場波，既然隨時有事故，就算開都係避之則吉囉。
擺明唔益錫耶納
呢場波費倫天拿非勝不可，據講「費倫」球迷已準備一旦出現和波，愛隊返魂乏術就會衝落場，旨在拖埋鄰會錫耶納落水！話說費倫天拿家陣以三十九分排尾二、錫耶納多一分排尾三（最後一場對阿特蘭大），而布雷西亞就四十一分。「費倫」球迷用意係如果隊波救唔番，索性一分都唔要，等布雷西亞攞晒三分，令錫耶納贏波都未必有用，呢招損人不利己，夠晒毒。除「費倫」球迷外，唔知重有無其他隊球迷準備搞事呢？
包機載Fans睇波普軍識慳請自費
普雷斯頓下周一同韋斯咸爭最後一個英超聯升班席位，球會決定安排一部波音747珍寶客機，接載球迷到卡迪夫；航班安排一早出發，等球迷多啲時間準備幫球隊打氣。不過，機票唔係免費，每人最少收一百九十九鎊，又難怪嘅，話晒英冠球會無太多錢，萬一輸波升唔到班咪好蝕。
招攬半紅不黑兵愛華頓利人利己
愛華頓不斷招兵買馬，早前簽咗熱刺西蒙戴維斯後，最近力邀車路士柏加過檔，重有桑恩戴維斯、羅比堅尼等都係收購目標，「拖肥糖」來季肯定陣容鼎盛。其實，愛華頓攞到歐冠盃參賽資格救番唔少半紅不黑球員，皆因球會羅致目標全部都係此類，真係利人又利己。
來屆無得打足協盃畢爾包賣主將雙失
西甲球隊畢爾包季中有過一輪勁勢，點知最後連來季直接參加足協盃嘅資格都保唔住！進軍唔到歐洲，亦即係話來季收入正一「水瓜打狗」。難怪最近頻頻賣走主將，包括迪賀奴去車路士、艾斯基路去巴塞。雖然收番筆安慰獎，但實力大減之下，又唔知要到幾時至可以威過！
想攞多7日假被拒大哨征戰密聽腳軟
朗拿度又搞搞震！話說皇馬球員暑假將有四十日時間唞暑，但由於「大哨」要參加世盃外圍賽同洲際國家盃，數吓得番十日休息。日前佢就同教練盧森貝高求情攞多一個禮拜假，點知被對方一口拒絕。我求大俠認為教練好應該體諒吓朗拿度，如果佢腳軟軟咁歸隊咪重衰。
逢周一至周五見報