羅嘉良前年年尾以一千五百萬買咗間愉景灣海澄湖畔二千一百呎獨立屋，馮仁昭聽聞佢間屋風水好，嘉良入住後風生水起，喺內地拍劇豬籠入水，而且間屋重升值一倍，都咪話唔和味，所以近日佢亦趁樓價高企放盤，地產公司重幫佢開價二千二百萬㖭。
嘉良上星期已經搬離海澄湖畔，搬咗去愉景灣另一幢過三千呎兼又係靚風水嘅獨立屋嗰度住，佢由細屋搬大屋，梗係要添置家具啦，日前嘉良就冒住微雨，喺跑馬地連續行咗幾間家具店同燈飾公司，睇嚟佢都應該有啲心水斬獲。
靈蟹伏水名利雙收
風水師李丞責就話愉景灣自成一國，地形似隻蟹，彎位聚水，有聚財之效，住喺嗰度嘅人利出門搵錢，嘉良海澄湖畔舊居就喺正蟹中間，風水上叫做「靈蟹伏水」，即係聚財兼易得名聲咁話喎。
此外，無綫最近半夜重播嘉良舊作《創世紀II天地有情》有唔錯收視，亞視就即刻食住上，喺下周一起播映嘉良狽飛嘅內地劇《非常皇帝生擒鍾無艷》，今次係嘉良離開無綫後，首次有劇喺亞視度播，但佢喺劇中用配音，所以同無綫冇牴觸喎。
鄭融解凍求教杜麗莎
鄭融早排傳佢因為掛住拍拖俾公司雪藏，不過𠵱家曝光率已經高返。鄭融日前接受《HIM》雜誌訪問，佢話最近忙練歌同為新碟錄音，𠵱家跟緊杜麗莎（Teresa）學唱歌，重話自己好想同杜麗莎或者黃耀明合作，佢話：「我同Teresa性格相像，所以好投契，佢畀我一種親切感，如果我哋合作一定有火花！」
薛凱琪問吳卓羲點解伸脷
薛凱琪噚日接受商台訪問，佢透露前晚相約一班演員一路打邊爐一路睇《學警雄心》大結局，問佢有沒有留意之前吳卓羲同楊怡咀嘅一幕，男方咀嗰陣伸咗條脷出嚟，她聽後大笑話：「有呀，不過如果係我就會問佢做乜伸脷。」另外，《學警雄心》前晚大結局平均收視高達三十七點（約二百四十二萬人次收看），成績唔錯。
周麗淇拍胸變互搣
周麗淇噚日去新城電台接受訪問，有報道指佢出席派對慘被抽水兼拍胸，周麗淇噚日否認有呢件事，重解釋對方只係佢嘅髮型師，而佢兩個係玩緊好低能同幼稚嘅互搣遊戲，只係角度問題所以先產生誤會，但就絕冇發生拍胸呢件事。
伍佰生BB睇緣份
伍佰自從公布咗已婚消息後，身邊朋友開始追問佢哋幾時生BB，伍佰覺得生BB都好講緣份，要順其自然。伍佰近日專心準備下月十一日嘅「厲害」演唱會，佢同ChinaBlue不停綵排，希望令歌迷耳目一新，伍佰不但參與籌備同演出，佢重親自設計埋工作人員嘅制服，認真親力親為。
