滙豐同恒生大執位，兩位新老細噚日正式上班，吸引傳媒一早到場拍照，兩人心情都靚到震。第一日返工嘅滙豐亞太區主席鄭海泉（圖一）話，七年前調任恒生副董事長時覺得自己好似灰姑娘，𠵱家重返滙豐，就好似灰姑娘遇到白馬王子一樣。佢又話自己心情複雜，調任前喺滙豐總行三十四樓辦公，𠵱家又重返呢層樓，但憑窗遠望維港，新建有國際金融中心同AIG大樓，富麗華酒店就拆咗，過去清晰可見嘅獅子山，今日就因空氣污染而隱沒；大有景物全非之慨。
另一邊廂，柯清輝第一日返工，更上層樓，當然冇灰姑娘之感。佢話自己喺恒生董事局五年，有時都會同恒生啲同事食飯。其實恒生嘅文化，柯總真係好熟悉，一上場就讚恒生分行令人體會到熱誠嘅待客之道，不過問到柯總識唔識背恒生嘅八句真言，佢就話「慢慢會識」喇！
梁鑑章攝
傳真︰2623-9278
電郵︰[email protected]