八方早前同煲呔算過，如果擇二十六號（今日）宣布辭職，應該冇大問題，點知立法會班議員無心戀戰，講咗五粒鐘就速速投票，結果煲呔冇見人，就大功告成。
煲呔、肥龍同心戰室核心成員見為時尚早，而啲傳媒又起晒哄講三講四，為免無謂忖測，不如快刀斬亂麻，呢頭搵人通知北京封辭職信上緊嚟；同時又出稿叫記者去發布會。煲呔其實已萬事俱備，只欠東風，既然趕得及早一日，就早一日，反正《通勝》話二十五號（噚日）都係好日，宜祭祀祈福同搬遷，亦宜開市，咁煲呔順便講埋準備参加補選特首，最好不過。
權威消息同八方講，劇本中從來冇召開特別行會嘅安排，但係就的確冇預到咁順利，唔使等到星期四就搞點晒。
由今日開始，煲呔休假，佢位新聞秘書當奴仔亦放假一個月，同煲呔有關嘅查問，要搵番蔡瑩璧問。
蔡小姐六月先放假，不過，絕對唔會係悠長假期，始終身為新聞處處長，要隨時候命。
傳真︰2623-9278
電郵︰[email protected]