北京導演、胡錦濤一聲Cam麻嗱，煲呔即時埋位交戲，第一場「辭職放假，等待中央批准」！
開記者會，神色凝重，主角入戲交足晒貨！既然係咁，身為香港金像獎最佳男配角嘅老甘草演員霍英東，又點會缺場呢？老霍即時彈出，大讚煲呔，並瞓身支持！
國家級「政治智慧」
老霍兩三年前至狂嗌過「我挺董」，點知霍英東挺董，胡錦濤唔挺，阿董終於因自稱「腳痛」，企唔穩，挺唔住冧咗檔嘞！老霍即時改口，亦露骨挺曾，呢啲就叫做國家級領導人嘅「政治智慧」嘞！
反為民建聯馬力，態度曖昧夾消極，口稱「歡迎曾蔭權辭職」（呢句當然係真，係想佢扯咗唔好再返嚟！），不過就話佢個黨會唔會提名曾某競選，就「稍後決定」！
呢嗱嗱嗱，國家痛錫邊啲人多啲，就喺呢啲節骨上見真章嘞！霍英東挺曾，挺得快速，挺得毫無畏縮，點似得馬力，唔係咁挺，或者明挺實踩，挺得有氣冇力！唔怪得人哋霍英東愛國愛到身家億萬嘞！曾爵士參選，下一步，國家就要睇吓：呢隻係我隻馬，邊個提名，邊個膽敢唔提？若然提名，邊個快手，邊個特登拖慢，甚至彈弓手！上趟提名老董就咁快，今次唔提名煲呔，即是明侮辱緊胡錦濤，提名煲呔慢三拍，即是唔愛國，豈容民建聯重兩頭望？
夠膽提名達仔肥詹
夠膽嘅就唔好提，或者「選委會」內全個民建聯，一半提名李永達，一半就提肥詹！嗱，咁就叫做真夠薑嘞！不過，敢唔敢，呢又，敢嘅，就唔係民建聯喇！
所以八方相信，八百「選委」，有好多個，會一路個心講緊粗口，一路乖乖哋舉手，強顏歡笑咁最終攬曾吻權！霍老吹雞，邊個唔歸隊？霍老好嘢，佢挺曾，八方就帶頭挺章子怡！
傳真︰2623-9278
電郵︰[email protected]