新地觀塘創紀之城五期商廈同商場apm落成入伙，雖然項目係出租，但同區各類物業買賣，大家唔多唔少都話同佢扯上關係。
位於鴻圖道嘅南洋廣場，高層一室，二千七百呎，投資者二月以呎價千七買入，中記李彥樺話，剛以每呎近二千七賣出，幾個月執二百七十幾萬，升值近六成。
李彥樺話，apm效應，令到同區物業買賣受惠，近月淨係南洋廣場，就已經有八至十宗成交。𠵱家得番幾個放盤，每呎叫價統統要三千以上，當中有一個，重係屬於摸貨。佢預期，南洋廣場造價，短期內可以再挑戰新高。南洋廣場屬於甲級工貿樓。
海翠賤價租出
銀行加息，令到唔少業主要降低物業叫價，估唔到連租盤都一樣要減。
屯門海翠花園四座中層C，六百二十八呎，業主年初拎出嚟放租同放售，堅持月租四千六，一個月前就算有客畀到四千五，佢仍然唔制。點知，今個月銀行突然加息半厘，業主又唔想監平賣咗佢，惟有繼續放租，但呢個時候屬於淡季，冇乜租客搵樓，咁啱有一個，還價三千五，業主諗咗幾日，竟然答應，計落減幅近兩成四。
祥益盤嘉茵話，租客係一對夫婦，原本想搵啲月租三千至四千嘅兩房單位，睇完海翠，諗住租金超出預算，所以隨便還咗個價，點知業主肯接受，認真好運。
海翠𠵱家共有十五個放租盤，月租叫四千五至四千六。
浪翠園搶到貴
買家好多時因為睇見單位裝修靚，先至興起入市念頭，發展商整個靚靚示範單位畀人睇，都係咁原因。
二手住宅又點呢？其中一個方法，就係透過報章嘅樓盤報道，提高單位曝光率，有時重會有意想不到嘅效果。
本報早前報道過嘅深井浪翠園，聽美記講，已經賣咗，個價重高過業主叫價㖭。
呢個浪翠園九座高層C室，六百零八呎，業主改作開放式設計，叫價二百六十萬，獲兩個買家追價，終於以二百八十五萬成交，比叫價高近一成，呎價四千六百八十八，創新高。
代理生意水退船低
銀行周初加息半厘，樓市成交即刻靜晒，市場又冇類似尖沙嘴凱旋門嘅豪宅項目推出，成交少咗，代理嘅收入都差過上個月。
利記執行董事廖偉強就話，五月頭二十四日，營業額四千七百萬，比起上月同期嘅五千七百萬，已經減少咗十七點五個巴仙。佢重話，今個月係考試季節，屬於樓市傳統淡季，全月嘅營業額，預計只得六千萬，比上個月少一成九。
中記住宅部今個月生意都少咗兩成三，執董陳永傑預計，全月減少兩成。
電郵地址：[email protected]
