徐小鳳將於七月舉行復出個唱，八場門票早前一日內沽清，結果有歌迷投訴有炒黃牛飛情況，昨日英皇乘勢加開七場，合計小鳳姐將演出十五場個唱，而加場門票明日公開發售。
徐小鳳將會於七月舉行「金光燦爛徐小鳳演唱會2005」，日前公開發售八場門票，反應熱烈，一日內全部售罄。
主辦單位英皇娛樂昨日宣布再加開七場，即總共舉行十五場，日期由七月二十三日至八月六日，加場門票將於明日公開發售，後日則供網上訂票和電話訂票。
呼籲抵制黃牛黨
頭八場門票售賣當天，英皇已接到不少觀眾電話，詢問何時加場，又有歌迷投訴有人在售票處炒黃牛飛，部份門票竟炒至一千二百元，讓排了一日隊卻向隅的fans十分氣結。
英皇演唱會部總經理AlexFung昨日在電話中說：「我哋收到好多電話，其中有市民投訴有人炒飛，小鳳姐當然唔贊成炒飛啦，上次公開發售嗰日又落暴雨，佢話啲歌迷咁辛苦，排成日隊都買唔到飛，勞氣係人之常情，佢都唔好意思，所以我哋商量過後，決定一加就加七場咁多，等有心買飛嘅觀眾可以買到飛。」
AlexFung又謂黃牛黨以高市價數倍價錢兜售門票，屬非法行為，並呼籲市民和歌迷遇到此情況，應即時通知警方。
屋企樓下排長龍
小鳳姐對於八場門票一日內售清，感到十分開心，並感謝歌迷支持，她在電話中笑說：「最近唔止賣飛地方排長龍，連我屋企樓下都排長龍，但全部係狗仔隊，有好多傳媒朋友排晒隊等我，真係好熱鬧。
「我喺屋企睇到佢哋，我都戥佢哋辛苦，日曬雨淋咁，我想叫佢哋唔好等啦，咁辛苦我又招呼唔到大家，我覺得好唔好意思。我喺適當嘅時候就會出嚟㗎，𠵱家忙緊籌備工作，我好好，多謝大家關心。」
