現年三十六歲嘅荷李活金像女星雲妮絲惠嘉（ReneeZellweger）近排頻傳喜訊，繼兩星期前嫁咗畀鄉謠天王KennyChesney之後，Kenny即刻攞咗個鄉謠界「全年最佳藝人」獎，而老婆雲妮亦唔輸蝕，前日佢獲荷李活榮譽市長喺荷李活星光大道上頒授名人之星，而當日重被命名為「雲妮絲惠嘉日」。
朗侯活撐場
雲妮前日着一條湖水藍吊帶裙出席名人之星嘅揭幕儀式，當日佢重搵嚟新片《CinderellaMan》嘅金像導演朗侯活（RonHoward）同埋金像監製BrianGrazer一齊撐場，不過佢老公Kenny就唔見咗人。
當日雲妮為佢粒名人之星揭幕時，吸引咗好多fans前往觀禮，一向成個儍大姐咁嘅雲妮上台時話：「我喺八八年首次同朋友嚟星光大道時，自己影相影咗兩筒菲林，由細到大我都好希望可以擁有自己嘅星星，不過我從來都冇諗過自己會有咁嘅一日。能夠獲邀成為星光大道嘅一分子，我覺得自己就快死喇！」而當日佢重依番傳統，為自己粒星星影番張相。荷李活市長重將前日五月二十四號定為「雲妮絲惠嘉日」，感動到雲妮眼濕濕。
圖片：美聯社、路透社