睇嚟經紀陳果然冇講錯，泛海酒店（292）確係乾炒牛河，繼前日勁升後，噚日急回31.19％，收0.75元，成交股數2076萬股，金額1833萬元。
經紀陳噚日有新補充，原來泛海酒店部份貨源落在某些大戶手上，聽講佢哋揸咗呢批貨好耐，前日炒高，一來想露兩手，二來想趁機散貨。
另外，曾經受萬千炒家寵愛的文化傳信（343），多個月來異常低調，但江湖近日傳出，文傳將於日內有搞作，可能係收購同集資一齊嚟，所以要密切睇實。
文傳在3月時，曾有大戶沽貨，一度質落至最低的0.275元，4月份時，股價曾經升返0.34元，可惜無以為繼，近期則一直在0.325元水平橫行，噚日收0.325元，冇起跌，成交股數2339萬股，金額766萬元。
經紀陳話，其實文傳的收購行動已經傳咗一段時間，但遲遲未能落實，好似係因為一啲技術原因，但近兩日則傳出好快會搞掂。
慕容小初