滙豐噚日召開非正式股東會，亦係滙豐亞太主席艾爾敦退休前最後一次出席股東會，佢太座都坐喺股東會最後一排，支持老公。今年出席嘅小股東異常鼎盛，超過三百位，滙豐標準fans小股東吳伯，藉敦哥退休機會，向滙豐各高層，從主席龐約翰爵士、行政總裁葛霖，到候任滙豐亞太主席鄭海泉、恒生副董事長柯清輝及滙豐銀行執行董事王冬勝，都逐個致敬。當然艾爾敦就要讚多兩句，佢話人哋做嘢好就話「做到加零一」，敦哥就做到「加零七」。
行將退休嘅敦哥心情大靚，散會後與記者同員工合照，有人問回復普通股東身份嘅敦哥，日後發現集團有乜出錯時，會唔會貫徹敢言作風？敦哥笑言，喺亞洲居住多年，學會從長線角度睇嘢，若有任何意見，會喺適當場合表達，盡一個股東責任。
今日起接棒嘅泉哥，就話感到無尚光榮，艾爾敦過去幾年對滙豐作出極大貢獻，佢接任難免有壓力，但敦哥亦留下一個非常出色嘅團隊，可以繼往開來。
爆料熱線：29290000、27860099
報料傳真：26239278
報料電郵：[email protected]